PABLO R. GUARDADO
Tres 16 años de vida y 700 númberos na cai, Les Noticies va dexar d’acudir a la so cita fiel de los vienres colos llectores. La crisis, al igual qu’asocedió con otres cabeceres en Galicia, arrampuña a Asturies el so únicu periódicu dafechu n’asturianu.
Inaciu Iglesias, editor de Les Noticies, espublizó na web del selmanariu una editorial entitulada ‘Una decisión difícil’ na qu’anuncia’l fin de la edición papel de la espublización: “Son tiempos duros pa tol mundu, vivimos en plena crisis y hai una llei non escrita que diz que’l periodista nunca tien que ser la noticia. Pero, vistes les circunstancies, van permitime que faiga una escepción. Depués de dieciséis años y 768 númberos nos quioscos, esti selmanariu, Les Noticies, va dexar d’editase en papel. Efectivamente, el periódicu que tien nes manes –la editorial ta pensada pa la edición impresa–, como consecuencia d’una decisión bien mala de tomar, va ser el penúltimu exemplar d’una aventura qu’empezó a mediaos del añu 1996. La selmana qu’entra vamos editar el númberu 769 y con ello vamos ciarrar un ciclu que fomos a abrir hai década y media, cargaos d’ilusión, de la que saquemos a la cai’l númberu cero”.
Nel restu de la editorial, Iglesias fai un balance de lo que foron estos 16 años de vida del selmanariu, enumerando los avances de la espublización nesti tiempu y el papel importante que cumplió pa visibilizar la nuesa llingua. Sicasí, Les Noticies nun va morrer con esta decisión y va siguir trabayando en formatu web, mesmu camín que siguieron otres cabeceres similares nel país vecín con idioma propiu, como Galicia Hoxe o el Xornal de Galicia, anque esti últimu tenía dalgún conteníu en castellanu.
ANEXU: Una decisión difícil.
(d’Asturies.com, 26-01-2012)
Les investigaciones del casu Renedo-Trabe-Antón García-Saltadera-Les Noticies parez qu’entamen a dar resultaos.
La investigación del casu Renedo entama dar resultaos…
Rebulguinos, ¿podíes esplicar esi interesante asuntu, pa que rellume y rescample la verdá que se nos tapez quién sabe por qué males intenciones? Déxesnos con enormes ganes de saber. Esplícanos, tu que sabes.
Explícotelo yo: Vilareyo tien un abollón d’equí a Colombres y da-y pola cosa confabulatoria y conspiranoica.
Que lu pongan a trabayar d’una vez, ho. ¿Naide sabe cómo pegar el toque a la inspección d’Educación de la Comunidá de Madrí? (o a la Conseyería de Sanidá, que nun sé de cuala dependerá).
Ah, taba yo tamién atentu a les esplicaciones de Rebulguinos, a ver qué coses tan interesantes nos cuntaba. Porque yá se sabe, hai informaciones relevantes que t’escuenden, y xente como Rebulguinos contribúi al progresu de la Humanidá amosando la Verdá. Pero nada, si ye una alucinación, nun merez la pena tirar del filu.