DAMIÁN BARREIRO
Les Noticies.com acaba con esta cuarta entrega la entrevista que mantuvo col presidente asturianu y líder de Foru Asturies: la primera concedida a un mediu de comunicación asturianu depués d’anunciar la convocatoria d’elecciones pal 25 de marzu. Nesta última parte, Álvarez-Cascos fala de la ideoloxía del so partíu y del papel que tien que tener la llingua asturiana dientro de la sociedá.
Na campaña electoral de mayu acusáronlu de ser d’estrema derecha, ¿qué opina d’esti axetivu?
Parezme que tienen poca imaxinación y poca afición a trabayar. Les ideoloxíes convencionales hai muncho tiempu que pasaron a meyor vida. Nestos momentos n’Europa, les etiquetes cayeron y el programa européu de gobernanza, que ye la tercer vía, ye xustamente’l que figura nos principios inspiradores de los estatutos de Foru. Una tercer vía qu’un Premiu Principe d’Asturies, Anthoy Givens, yá esplicó a los ciudadanos.
Foru ye un partíu que diz defender el país y les sos señes d’identidá. ¿Podemos calificar a esta sigla como asturianista?
Les etiquetes son siempre reductores. Soi poco partidariu de buscar una palabra que depués pue reinterpretase gramaticalmente y que pueda definir un discursu tan complexu. Lo meyor ye dir a los nuestros estatutos y definir a Foru como se quixo definir: un partíu reformista, europeista y defensor de l’autonomía de les comunidaes y los Conceyos –dalgo que namás recoyemos nós–. Tenemos un profundo raigañu asturianu, pero tamos comprometíos col Estáu de les autonomíes, que ye lo contrario del Estáu de los nacionalismos. La diferencia ye que’l sentíu d’identificación con Asturies que tenemos ye compatible col de la pertenencia a España como nación. Polo tanto, el nuestru sentíu d’autoidentificación ye’l de la frase Más Asturies, meyor España: ye’l discursu contrario al nacionalismu, que lo que quier ye más pal so territoriu y menos pal Estáu. Por eso, nun quiero qu’etiquetes tan simplificadores como esa desenfoquen la verdadera esencia y principios de Foru, que me parez una fuercia mui singular. Vamos demostralo nel Congresu con un discursu onde vamos defender Asturies, pero tamién una políticia nacional seria que va contrapesar les tendencies nacionalistes y los discursos insolidarios.
Hai un par de meses, dixo nesti mediu de comunicación que nun ve la necesidá de falar n’asturianu. El director xeneral de Política Llingüística faló de polítiques de costu cero qu’ayudaren a normalizar la llingua. ¿Fai esto que reconsidere la situación?
Parezme que lo más importante de les polítiques llingüístiques ye que sían arriquecedores y non emprobecedores. Polo tanto, si una política llingüística impón l’asturianu o restrinxe les posibilidaes de comunicación del ciudadanu ye una política enquivocada. Los asturianos tenemos el privilexu de tener l’asturianu y nun voi facer un discursu eruditu de lo qu’esto significa. Val con recordar los primeros intentos de Xovellanos de dotar a Asturies d’un diccionariu d’asturianu. Lo que tenemos que facer ye conservar y potenciar esa riqueza como un elementu d’arriquecimientu cultural y de llibertá. Nun soi partidariu d’imposiciones y de restricciones: de convertir les llingües de cada territoriu en barreres alministratives, cuando n’Europa tán cayendo les fronteres económiques y polítiques. La imposición de barreres llingüístiques nes alministraciones valdría pa frañar el mercáu únicu y el fortalecimientu de la Unión Europea.
Llamazares va presentar en Madrid una propuesta pa que los profesores d’asturianu vean reconocidá la so Especialidá. ¿Va apoyar el diputáu de Foru en Madrid esta iniciativa?
Nun me presta improvisar les decisiones. Nós tenemos el nuestru programa, que ye accesible a tolos asturianos. En cuanto a les iniciatives de los demás grupos, los nuestros órganos políticos y parllamentarios van tomar les decisiones que yo, nesti momentu, nun toi en condiciones d’adelantar. Nós nun descalificamos les propuestes según de quien vengan. Una propuesta bona p’Asturies y pa España va ser apoyada por Foru venga de quien venga. Si esta propuesta coincide col nuestru programa y ameyora lo que nestos momentos hai, con toa seguridá, y anque sía d’IX, va ser apoyada por Foru.
Nuna situación de prórroga presupuestaria, el Gobiernu tien potestá de convocar subvenciones. Teniendo en cuenta la importancia que tienen estes partíes pa normalizar l’asturianu, p’apoyar y manterner esti sector empresarial, ¿va’l so Gobiernu a convocales y publicales enantes de les elecciones?
Agora tenemos restricciones mui importantes y severes na xestión presupuestaria, sobre manera pa poder tomar iniciatives que supongan convocatories de concursu nueves. Nesti momentu nun quixera que lo que tien que facer el Gobiernu asturianu con un presupuestu prorrogáu conviértase en polémica. Yá hubo polémica abondo coles decisiones que tomó’l Gobiernu anterior tando en funciones, como pa qu’agora nun síamos consecuentes. Lo que fiximos desarrollando’l presupuestu anterior parezme que ye conocío y nós nun frenamos nenguna de les decisiones puestes en marcha. Amás, convocamos dalgún d’estos concursos que taben yá preparaos. Pero col escenariu que tenemos nel 2012, nun sé si les restricciones conceden marxe pa dalgo más que pa executar los compromisos yá contraidos nes obligaciones plurianuales del 2011. Nun lo sé nesti momentu.
P’acabar, ¿pue facenos una valoración de lo que significa pa una llingua minorizada como l’asturianu, que necesita d’acciones de normalización, la pérdiga d’un mediu de comunicación como Les Noticies?
A mi préstame tomar lo positivo. Si esto nun ye un cese y ye un pasu hacia’l futuru, quedo con esta parte. Ye mui importante que pueda siguir y que, como faen los grandes medios de comunicación del mundu, potencie lo dixital. Les circunstancies del momentu dificulten la edición escrita del quioscu, pero abren víes de futuru. Hai que desear una recuperación ceo. Sicasí, nun sé si les necesidaes siguen tando nel papel: la decisión pue parecer triste y de recorte, pero pue ser una catapulta pa salir potenciaos de cara al futuru y dientro del escenariu dixital. Deséu lo meyor pa Les Noticies.
(de Les Noticies, 04-02-2012)
