DAMIÁN BARREIRO
Penélope Miranda, presidenta de l’Asociación de Trabayadores de la Normalización Llingüística (ATNL), afirma que si por mor de la situación política actual –nun periodu de prórroga presupuestaria y con un parón pola convocatoria electoral– nun hai subvenciones pa fomentar l’usu del asturianu nes entidaes locales, los servicios de normalización pue que nun puedan entamar nenguna actividá. Estos servicios cuenten con tener una partida del Gobiernu pa mantener los puestos de los trabayadores, pero lo que nun ta claro ye si la Conseyería de Cultura va convocar les subvenciones en réxime de concurrencia competitiva pa la normalización del asturianu nes entidaes locales. Estes partíes permitíen que los conceyos destinaren carga de trabayu a los servicios y qu’estos pudieren realizar campañes de sensibilización social.
En declaraciones a Les Noticies, Miranda esplica que los servicios trabayen gracies a les campañes y el trabayu alministrativu, «y si nun hai subvenciones pa entidaes locales namás queda la parte alministrativa, pero esta depende d’hasta onde quier llegar el Conceyu col billingüismu, dalgo que munches veces nun quieren asumir». La presidenta de l’ATNL comenta que la información que tienen ye que nun va peligrar la partida pal funcionamientu de los servicios al ser puestos de trabayu directos, «anque hai conceyos colos servicios pesllaos y yá tamos en febreru». Por eso, afirma que l’escenariu políticu actual mantién a los trabayadores nuna situación d’impasse: «Tenemos qu’esperar qué pasa coles elecciones, qué partíu gana, si va haber Dirección Xeneral, si’l partíu que gane va comprometese cola normalización y de qué manera… Esti añu vamos de sustu en sustu».
Miranda esclaria qu’hai mui pocos servicios que tengan una partida del mesmu Conceyu: namás Xixón, qu’asume tol presupuestu, y L.lena, que destina 9.000 euros, mentes qu’otros ponen una parte pa que la contratación sía a xornada completa. Esta falta de compromisu de les entidaes locales y la falta de subvenciones del Gobiernu ta produciendo qu’haya recortes. «Por exemplu, en Samartín del Rei Aurelio recortaron dos hores diaries», esplica Miranda, qu’añade que nos demás conceyos puen alcontrase con un parón y nun poder entamar nenguna campaña, «cuando estes permiten dinamizar comerciu, hosteleria, educación, turismu, igualdá, salú… El parón va repercutir en tola sociedá, onde la presencia del asturianu pue menguar muncho», diz Miranda.
Situación d’inestabilidá
Too esto que ta provocando la situación política d’Asturies súmase a la inestabilidá que viven los servicios de la normalización dende qu’hai nueve años se crearan los primeros. Prueba d’eso ye qu’en xineru pesllaron los servicios de Llaviana, Corvera y Mancomunidá Ozcos-Eo, a los qu’hai que sumar el casu del de Mieres, que ta peslláu dende agostu. La presidenta de l’ATNL esplica qu’actualmente los trabayadores de los otros servicios tán asumiendo la planificación de les campañes d’estes entidaes y asina poder xustificales: «Les más de les veces son campañes que facemos a comuña y si cai dalgún conceyu supón menos presupuestu, dalgo que repercute nel trabayu común».
Otra manera, esplica que la mayoría de responsables de los servicios planifiquen el trabayu anual teniendo en cuenta qu’al llegar el 31 d’avientu «pues alcontrate con que tengas que marchar pa casa». Tamién hai que tener en cuenta que la xustificación de les subvenciones pa entidaes locales tuvo que facese enantes del 31 de xineru del 2012, cuando munchos servicios ciarraron el 31 d’avientu, «polo qu’entró en funcionamientu la militancia llingüística de los trabayadores y munchos asumieron la responsabilidá de xustificar les subvenciones dende casa, ensin tener el puestu de trabayu y ensin cobrar». P’acabar, diz que la estabilidá tamién tien que partir del mesmu Conceyu, pero esplica que dependen siempre del Gobiernu y del so presupuestu, «porque los conceyos namás asumen los servicios pola subvención y, si nun llega, piésllenlos».
(de Les Noticies, 08-02-2012)
