Editáu por La Compaña del Ronchel de Villaviciosa, Cantares asturianos ye una recopilación de 130 temes del cancioneru popular asturianu, ente ellos, dellos de Villaviciosa y los conceyos de la rodiada. El llabor corrió a cargu del maliayés Miguel González Pereda en collaboración colos miembros de l’asociación El Ronchel.
El llibru, que nun va tar a la venta, va repartise pelos chigres y va presentase en delles sidreríes de La Villa esti xueves 16 de febreru a les ocho la tarde. N’El Cañu ta previsto que cante la Tertulia Errrante, na sidrería El Horru va tar la tonada de Lolo de Cabranes y en La Tierrina va haber dalguna actuación sorpresa.
Nel llibru puen alcontrase canciones como «Canciu de la Comarca de la Sidre», «Villaviciosa hermosa», «Danza de San Xuan d’Amandi», «La Llechera de Villaviciosa», «Himnu al Lealtad», «La Mariñana», «Ábrime la puerte, Lola», «Villaviciosina», «La farola de Tazones» y asina hasta 130 cantares. Dellos son recuperaos polos editores y otros son del cancioneru tradicional asturianu, como «Mocina, dame un besín», «Carretera abaxu va», «Chalaneru», «Santa Bárbara bendita» o «Nel campu nacen flores».
La Compaña del Ronchel, d’equí a unos díes, va espublizar tamién El Fumiacu, el periódicu satíricu sobre Villaviciosa que, como yá vien siendo vezu nestes feches d’Antroxu, va repartise per dellos comercios maliayeses.
(de Les Noticies, 14-02-2012)
