José Manuel Pérez: «Nun parez razonable facer, de la excepción, norma»
Los alcuerdos algamaos na ponencia pa la reforma estatutaria tán xenerando bien de crítiques dende’l puntu de vista xurídicu por cuenta de la decisión de que dellos puntos precisen pa la so aprobación una mayoría de dos tercios, como ye’l casu de la teórica llei que regularía l’usu y promoción del asturianu. Asina lo pon de manifiestu’l profesor de Derechu Alministrativu de la Universidá d’Uviéu, José Manuel Pérez, qu’explica qu’esti tipu de mayoríes namás se requieren pa casos mui excepcionales, polo que nun-y parez «mui razonable que se faiga de la excepción norma». Esta mayoría, amás de pal asturianu, demándase pa lo que son los órganos institucionales o la llei electoral. Sicasí, nun se requier pa cuestiones como crear la policía autonómica o’l Conseyu de Xusticia.
Otru aspectu nel que s’amuesen discrepancies pa col textu redactáu na ponencia ye l’aseveración de qu’Asturies «asume los valores de la Unión Europea» y de que va «cuidar pol cumplimientu de los sos oxetivos». «Esto nun ye asina, principiando porque nun se respeta la Carta de los Derechos Fundamentales de la Unión Europea», apunta’l xurista. Esti documentu diz nel artículu 21 que «se prohíbe toa discriminación, y en particular la exercida por razón de sexu, raza, color, oríxenes étnicos o sociales, característiques xenétiques, llingua, relixón o convicciones, opiniones polítiques o de cualquier otru tipu, pertenencia a una minoría nacional, patrimoniu, nacimientu, discapacidá, edá o orientación sexual». De siguío, l’artículu 22 explicita que «la Unión respeta la diversidá cultural, relixosa y llingüística».
José Manuel Pérez tamién cuestiona delles de les afirmaciones que se tán faciendo nestos díes, como l’argumentu dau pol diputáu socialista Fernando Lastra de que reconocer una carta de derechos ye anticonstitucional: «El Tribunal Constitucional ta diciendo tolo contrario y bien d’estatutos yá incluyeron esa carta ensin que naide se pronunciare en contra. Y, amás, les normes tán fundamentalmente pa eso: pa reconocer derechos».
Leopoldo Tolivar: «Si’l PP mantuviere otra actitú, yera fácil que ficiere movese al PSOE»
Leopoldo Tolivar Alas, catedráticu de Derechu Alministrativu na Universidá d’Uviéu, comentó, tres de la propuesta del grupu parlamentariu socialista sobre la redacción del artículu cuartu del Estatutu, que fala de la llingua asturiana, que «yera lo previsible». Amás, dixo que «si’l PP mantuviera, como dixo nun principiu, otra actitú, yera fácil que ficiera movese al PSOE un migayín. Menos la mención al gallego-asturianu, que ye xusto, el resto ta igual, nun siendo la cuestión terminolóxica de “asturianu” por “bable”». Tolivar sorrayó que «siempre tuvi convencíu de que, nesta materia, nun diba haber cambios».
D’otra manera’l catedráticu y director del Departamentu de Ciencia Política y de l’Alministración de la Universidá del País Vascu, Francisco Llera Ramo, declaró qu’«esti asuntu ye totalmente decepcionante. Amás, esta definición de la llingua como “patrimonio lingüístico” supón un retrocesu y un pasu atrás». Llera Ramo amás comentó que «tolo demás ye voluntarismu y, rebaxando’l estatus de la llingua asturiana, lo que faen PSOE y PP ye lliberáse de cualquier compromisu pa cola llingua».
Considera que «dende’l puntu de vista democráticu ye una falta de respetu a la realidá llingüística d’Asturies y de los asturianos y asturianes».
El secretariu xeneral de FETE-UXT, Daniel Rodríguez Vázquez, recuerda que, nel tema del asturianu, «cuando falamos de derechos llingüísticos y ciudadanos lo suyo ye reconocer que tol mundu tien derechu a expresase na llingua que quiera». Nesti sen, Daniel Rodríguez Vazquez caltién que «nun hai otra solución que la oficialidá», anque llamenta que «naide s’atreva a dar el pasu».
Esta solución ye la más amañosa al paicier del sindicalista pa evitar les situaciones recurrentes que se producen énte cualquier conflictu a cuenta del idioma -na alministración, na creación de titulaciones o especialidaes- «y que se xustifiquen porque nun hai oficialidá y asina tamos dando vueltes siempre». Ello ye que Rodríguez Vázquez piensa que, de nun actuar «con valentía»’l PSOE y el PP, vamos tar otra vez énte «una ocasión perdida, na qu’obliguen a parte de la sociedá a enrocase nun problema de solución mui fácil».
L’asturianu José María Álvarez, secretariu xeneral d’UXT de Cataluña -que valora la decisión tomada n’Asturies sobre la llingua «a títulu estrictamente personal»-, expón que «les llingües tienen qu’obedecer a realidaes y esi ye’l casu de Cataluña, onde hai una llingua que conoz y fala cuasi tola sociedá. Nel casu d’Asturies, anque nun se dan les mesmes condiciones, eso nun quita pa que nun se-y reconozan unos derechos a la llingua que l’ayuden a situase nel sieglu XXI porque, cada vez que muerre una llingua, muerre un patrimoniu irrecuperable».
Por esta razón, el sindicalista afincáu en Cataluña entiende que l’Estatutu había recoyer que l’asturianu «ye una llingua d’usu» y permitir «el so desarrollu natural». Otra manera, tamién esclaria que na cooficialidá «too depende del usu que se faiga depués, nun hai por qué cayer n’obligaciones».
El músicu asturianu d’El Sueño de Morfeo, David Feito, expresa la so decepción énte l’alcuerdu de nun da-y un estatus dignu al asturianu: «El mio sentir y el mio corazón dicen que ye una pena que vaiga perdiéndose dalgo que nos une a los nuestros güelos, a los nuestros padres».
L’artista valora l’asturianu como «una herencia cultural d’un valir incalculable, por eso dame muncha rabia que nun se nos reconoza a los que, d’una manera o otra, defendemos dalgo que ye mui nuestro». David Feito esclaria qu’anque nun tien una «opinión política», da-y la sensación de que «socialmente ye una oportunidá perdida; la oficialidá podía valir de frenu al desaniciu de la nuesa llingua».
Asturianos residentes fuera amuesen la so preocupación pola situación de la llingua
Fuera d’Asturies tamién s’expresa la preocupación porque nun se dea respuesta a la cuestión llingüística nel Estatutu d’Autonomía nuevu. Asina lo pon de manifiestu Luis Delgado, presidente d’ASMA (Asociación d’Asturianos en Madrid), que comenta que «ye una pena que lo qu’había ser pa integrar y xuntar, como ye una llingua, lleve al conflictu políticu y sía puntu de dixebra en cuenta de xuntura».
L’analista económicu Paul de Zardaín, natural d’Ayande y anguaño residente en París, asegura que nun-y choca l’alcuerdu algamáu ente’l PSOE y el PP: «You seique esperaba qu’el PP d’Asturias diba abal.lancar la posicion de la FSA pa cona l.lingua. IÍa una causa de xusticia social, peimeque. Nun se pode fader ideoloxia de lo que ia una herencia cultural». Nesti sen, Zardaín apunta que «pa la xente asturiano que tamos fora, ya you tou acabante de dir trabayar a Paris dende Washington, los socialistas asturianos abultanme inda mas cumo d’una domina franquista: un partiu alministráu dende riba abaxu ya con mal xeitu. Xente cumo Javier Fernandez ou Fernando Lastra son responsables de polarizar esti alderique».
Ún de los aspectos que destaca l’economista son les contradicciones nes qu’incurre’l PP nel tema llingüísticu:«No que cinca’l PP, paez que nun tienen torgas pa da-y un marcu l.legal al valencian en Valencia. ¿Seique n’Asturias estremámosnos tanto de Valencia ou Galicia? ¿Ia que nun somos quien pa oficializar la nuesa l.lingua l.lariega? ¿Hai menos cultura n’Asturias? Prexuicios hailos abondos». Al so xuiciu, el tratu que recibe la llingua asturiana respuende a una cuestión de poder: «La FSA quier abel.lugase na Xunta institucionalmente igual que feixo el PRI en Mexico ou Edinnaya Rossiya na Rusia de Putin. Pa eso, fai-ys falta’l poder alministrar la financiacion foriata, de Bruselas ya Madrid. Agora que nun hai perras en Madrid, nun sei cuantu vei durar el chollu de Javier Fernandez…».
El músicu, periodista y subdirector de programes de la radio pública de Galicia, Xurxo Souto, comenta énte l’alcuerdu del PSOE y del PP de nun reconocer la oficialidá que «la reivindicación pola dignidá del asturianu ye tamién la reivindicación pola del gallegu y toles llingües del mundu. Yá nun hai argumentos pa nun reconocer los derechos de los asturianofalantes como persones y ciudadanos».
Nesti sen, el músicu entiende que «l’esfuerciu de toos estos años de munchos sectores de la sociedá asturiana implicaos na normalización y pervivencia del vuestru idioma nun merecía esto. Los políticos asturianos tienen qu’entender que la diversidá ye vida y la uniformidá, la nada, ye asina de cenciello».
Tamién dende Galicia, el que fuera líder d’Os Resentidos y activista cultural, Antón Reixa, afirma que la non reconocencia de la oficialidá «ye una noticia permala. Y ello porque mesmamente en territorios onde l’idioma propiu ye oficial, como en Galicia, ésti tien munchos problemes y ye difícil l’aplicación amañosa de la Llei de Normalización Llingüística». El músicu destaca qu’esta noticia coincide «con un momentu especialmente críticu, con una ofensiva ideolóxica contra les llingües del Estáu, que parte d’una gran mentira: la supuesta situación de precariedá del castellanu. Nesti contestu pónense mui difíciles les coses pal asturianu, pero yo anímovos a siguir».
Pela so parte, l’escritor Suso de Toro principia por destacar la so conocencia dende va años d’escritores y llibros n’asturianu y apunta que «la lliteratura ye lo que meyor expresa históricamente’l pasu de fala a llingua y los deseos d’existir d’una llingua». Nesti puntu, el creador gallegu reflexona que, nun teniendo claru’l futuru de la so llingua, «tampoco nun sé dicir si lu va tener l’asturianu, eso depende de les persones, de los falantes».
Centrándose na situación d’Asturies, ún de los rasgos sobre’l que llama l’atención Suso de Toro ye «argullu enorme, diría incluso qu’excesivu, de ser asturianu». L’escritor pon un matiz a esti axetivu: «Digo excesivu porque contrasta cola falta d’arguyu que, en xeneral, tien la xente de Galicia. Pero esi arguyu de la pertenencia ye la enerxía pal existir colectivu; si amás d’esi arguyu los ciudadanos asturianos creen que ye útil o conveniente apostar por tener una llingua propia, entós l’asturianu va sobrevivir como llingua, pero nada ta garantizao na vida pa naide».
(de Les Noticies, 11-07-2008)
Tierra alantre, la mesma fala 
Deixar ua Respuosta