La Xunta de la Facultá de Filoloxía Asturiana aprobó güei la propuesta del decanu, José Antonio Martínez, de creación d’un Minor de llingua Asturiana (bloque d’asignatures de 48 creitos) con un 70% d’apoyu de los profesores presentes na votación a la que se sometió la propuesta.
L’alcuentru, celebráu esta mañana, tenía como oxetivu dar el vistu bonu a la propuesta de Títulos de Grau plantegada pol Decanatu, de cara a los futuros estudios de Filoloxía, tres la reforma de los estudios universitarios p’adautalos al Espaciu Européu d’Enseñances Superiores (EEES). El decanu proponía la creación de cinco títulos de grau (actuales carreres), compuestos por un Maior (120 creitos), combinable con un Minor. Ente los Minores, figura’l d’asturianu.
Dao que la posibilidá de creación del Minor contaba con una enmienda contraria presentada pol profesor Félix Fernández de Castro, esti puntu de la propuesta debió votase a parte del restu del conxuntu. El resultáu foi de 63 votos a favor del Minor, 27 a la escontra y cuatro en blancu, la mayor diferencia a favor de la llingua asturiana na historia de les votaciones de la Facultá de Filoloxía.
Enantes de la votación, hubo delles intervenciones n’apoyu a la propuesta del decanu, ente les que destacaron la de los catedráticos Antonio Vespertino Rodríguez (Llingües Romániques) y Ana Cano (ex decana y presidenta de l’Academia de la Llingua Asturiana), amás d’otros profesores, como Xulio Viejo, Juan Carlos Villaverde o Miguel Ramos Corrada.
El vistu bonu a esta propuesta supón que, per primer vez na historia de la Institutción académica asturiana, la llingua cuente con un títulu universitariu oficial y regláu que, si bien nun va ser igual qu’una llicenciatura, sí va exixise pa poder impartir clases de lligua asturiana tanto n’enseñanza primaria como en secundaria.
Esti aspeutu xeneró un alderique nos últimos díes, dientro de sectores asturianistes. La ex decana, Ana Cano, ta acabante de defender la insuficiencia del Minor pa formar a los futuros docentes d’asturianu, mientres otros profesores, como los del Seminariu de Filoloxía Asturiana, lo consideraben un avance sobre la situación actual.
Cinco titulaciones
Pese a la so repercusión mediática, el Minor d’asturianu ye un aspeutu más dientro de la propuesta xeneral de títulos del decanu, que foi aprobada definitivamente güei, ensin nin tan siquiera sometese a votación, puesto qu’existía yá un consensu previu.
La Facultá de Filoloxía va ofrecer cinco títulos de grau: Estudios Ingleses, Llingua Española y les sos Lliteratures, Llingües y Lliteraturaes Romániques y Comparaes (que va incluyir Maiores d efrancés, italianu y portugués), Estudios Clásicos y Llingües y Lliteratures Modernes (que va incluyir los memos Maiores de Romániques, amás d’un d’alemán).
La previsión ye qu’estos estudios se pongan en marcha de magar el cursu 2010-2011. Hasta entós, la propuesta ha desarrollase en dellos planes d’estudios, y aprobase n’instancies superiores, tanto autonómiques como estatales.
(d’Europa Press, 20-10-2008)
Tierra alantre, la mesma fala 
Hola,
por mais que leo e leo, nun vexo referencia al galego asturiano que falamos nel occidente. ¿Será que teño ceguera e vexo mal? ¿Ou será que como sempre se olvidan de todo e nos empaquetan a ALLA p’acó a mangoniar lo que pode?