XOSÉ LLUÍS CAMPAL FERNÁNDEZ
Diplomáu en Maxisteriu, profesor de segunda enseñanza y llicenciáu en Drechu, Fabriciano González García, ‘Fabricio’ (1868-1950), encarna un modelu de presona culta fondamente involucrada na cultura popular, pola que se siente encandiláu. Hacia 1919, y coincidiendo cola so xubilación, punxo en funcionamientu la denomada Academia Asturiana de Artes y Letras, de la que formaron parte Pepín de Pría o Pachín de Melás. Esi melgueru enfotu qu’enxamás esporpolletó, pretendía da-y un emburrión al teatru n’asturianu y naguaba por solventar problemes gramaticales y d’espresión lliteraria cola finalidá de favorecer una supervivencia al tresvel la llimpieza idiomática.
Les ‘asturianaes’ o coples festives de bon xacíu qu’aconceyamos equí (dos d’elles empobinaes a machucar xente ensin mollera que se mete en política municipal) del xixonés Fabricio apaecieron na revista habanera ‘Asturias’ nel so exemplar correspondiente al 26 de mayu de 1918. La primera entitúlase ‘Fanfarria’ y ye l’escarniu d’un babayu figurón:
El babieca del Tacañu
que non sabi solletrar
prúyei muncho fegurar
desque ye Alcalde Pedañu;
y pa enlluxar ¡lleve’l diañu!
los fatos de so calaña,
llevantó con pástia y maña
el desmayu del bigote
y cúntase el muy virote
que ye’l Kaxer d’Alemaña.
La segunda asturianada bautizóla Fabricio como ‘Caxigalina’. Fala d’un casu de ‘xusticia animal’:
Por ver lladrar al perrazu
de Lluisón el del Vericiu,
dio un rapazucu n’el viciu
de tirai cada cantazu,
que tocaba Dios a xuiciu;
pero un día de sopetu
trió el perru los todíos
y lladrales del magüetu,
y entós yera el rapacetu
quien piegaba los lladríos.
A la tercer asturianada, enllena de picardiosa doblez, púnxo-y Fabricio’l rótulu de ‘Pe’l filu’:
A Pinín de Puma, Xuan
por mal mote el del ‘Maíz’…
afalanciói n’a ñariz,
que yantó con vino y pan
una morruda perdiz;
mas mirándoi la camisa
espingorrotiá, el de Puma,
de farrapes dioi la risa
y díxoi: Llímpiate a prisa
que te dellata la pluma.
La cabera estrofa del grupu d’asturianaes llamóla l’autor ‘Voto en… suela’ y na mesma pue lleese la burlla que se fai d’un home públicu ensin valir dengún:
-¿Non vas a votar, Polesu?
-¡N’home non! Estoy de murnia,
y arreciendo que la furnia
ye bacín del Alcaldesu:
Por un cachu pan y quesu,
pa qu’elli cómia perdices
vótallu tu, y no empapices
que si a un tapín por mieu votes,
yo bótollu co les botes
metanos de les ñarices.
(d’El Comercio, 02-12-2008)
Deixar ua Respuosta