El vocalista de Dixebra, Xune Elipe, y el gaiteru de La Bandina, Santi Caleya, mostraron güei’l so deséu de dexar de tocar pola oficialidá de la llingua asturiana y entamar a tocar cola oficialidá de la llingua asturiana, en clara referencia a la reivindicación de reconocencia alministrativa d’esti idioma.
Dambos músicos ficieron pública asina la so presencia nel próximu conciertu pola oficialidá, anunciáu güei en rueda prensa pola organizadora Xunta pola Defensa de la Llingua Asturiana. L’eventu va tener llugar el próximu 25 d’abril (sábadu), de magar les 19.00 hores, nel campus del Milán de la Universidá d’Uviéu.
Paula Cristóbal fizo un resume de los 25 años de trabayu de la Xunta pola Defensa de la Llingua, que se tán conmemorando precisamente nesti 2009, pa dar la pallabra de siguío a los representantes musicales.
“Ye una pena que tengamos que volver tocar pola oficialidá, debería ser la última vez y l’añu que vien tocar nel primer conciertu cola oficialidá y non pola”, esplicó Xune Elipe. “Tamos esperando a ver cuándo tocamos cola oficialidá”, añadió Santi Caleya, pa dexar claro que’l so grupu actúa nesi conciertu porque “somos asturianos y astur falantes”.
Dixebra y La Bandina representen les dos variantes musicales que tarán representaes esti añu na cita musical reivindicativa: el rock y el folk. Amás de la formación de Caleya, les otres bandes que cultivarán lo tradicional serán Tuenda, Los Gatos del Fornu y Felpeyu. Pel otru llau, los de Xune tarán acompañaos nel cartel por Skama la Rede y Skontra, que va pesllar la cita. Les actuaciones tendrán llugar dientro una gran carpa, con dos escenarios y chigre con precios populares.
Xune aprovechó pa destacar la evolución del cartel d’esti conciertu, qu’esti añu llega a la so XXI edición. “Enantes, la mayor parte de los qu’actuaben yeren folk, pero agora hai un cartel con distintos estilos, lo qu’indica que l’asturianu llega a más capes de la sociedá”.
Cantar pola Oficialidá
Como novedá, el cantante avilesín anunció que nel conciertu va presentase el cantar pola oficialidá que dellos músicos asturianos graben tolos años dende hai cinco. Esti añu va incluyise nun CD que, baxo’l títulu ‘Una llingua pal rock’, recopila cantares de grupos como Los Berrones, Skontra o Escuela de Odio, conxuntos qu’empleguen l’asturianu en toos en dalgunos de los sos cantares.
Premiu Príncipe pa la Xunta
Pela so parte, Caleya destacó’l llabor de la Xunta pola Defensa de la Llingua, que “lleva 25 años reivindicando la oficialidá calteniendo un pacifismu impecable, sin romper un platu”. “Ye una asociación modelu, y táchasela de radical por reivindicar dalgo que ye de xusticia”, añadió.
Por eso pidió la concesión “de dalgún premiu, como los Príncipe”. “Lleva 25 años trabayando pola llingua, y nunca la nominaron”, añadió.
(d’Europa Press, 14-04-2009)
Tierra alantre, la mesma fala 
Deixar ua Respuosta