El gaiteru asturianu José Ángel Hevia será’l nuevu académicu d’honor de l’Academia de la Llingua Asturiana. El nomamientu va tener llugar demientres l’actu oficial conmemorativu del próximu día de Les Lletres, vienres 8 de mayu, nel Teatru Campoamor d’Uviéu. Ye la primer vez qu’un músicu ingresa na llista.
L’Academia fizo públicu güei’l so programa d’actos pa esta xornada, nel que s’inclúi’l nomamientu d’Hevia. La institución recueye asina los pidimientos que dende’l mundu musical asturianu se plantegaren d’entrada d’un músicu, por ser esti sector el que con más fuerza espardió la llingua asturiana.
Una de les últimes veces que se plantegó esta demanda foi nos cursos d’asturianu de l’Academia celebraos en Santantolín (Ibias) l’añu pasáu, nuna charra del cantante de Dixebra, Xune Elipe, que formuló la demanda de que na Academia tenía qu’haber dalgún músicu asturianu.
El nomamientu d’Hevia tendrá llugar demientres la Xunta Estraordinaria, que se va celebrar dempués del entamu musical a cargu del gaiteru Yago Bugallo. L’actu va siguir con una esbilla de poemes y acabará cola actuación de Xuacu Amieva, y con una espicha posterior nel restaurante La Gruta.
La ceremonia va entamar a les 20.30 hores nel Teatru Campoamor d’Uviéu.
(d’Europa Press, 23-04-2009)
Tierra alantre, la mesma fala 
¿Cualo va ser lo siguiente? L’academia cai en barrena con eses babayaes de nomamientos. Mentantu, estudiosos y lliteratos con más de trenta años arrecostines son arrequexaos, iñoraos, despreciaos. Y too seya por xunise los académicos (más d’ún, neofalante probetayu) al que manda y reparte premios. Sí, collacios, ALLA=CONSEYERÍA.
¿Y a quién-y importa lo que faiga una institución arcaica y española como l’Academia?
Propongo que pal añu qu’entra faigan académicu a Goyo Ramos.
Lo qu’había que pidir ye que-yos retiraren toles perres que-yos dan. Si tan representada ta l’Academia de la Llingua Asturiana en toles estayes del asturianismu, que seyan los mesmos falantes, simpatizantes, asociaciones, grupos políticos y demás los que los caltengan económicamente, con una cuota estándar fadríen milagros. ¿Nun s’alcuerden que dalgunos d’estos personaxes que se montaron l’inventu de l’ALLA tovieron n’aquella maravía que se llamó Conceyu Bable? Sí, home, pero eso tiempos son prehestóricos y nagüen por escaecelos. Ye muncho más prestoso pal ego allargar la man y char en bolsu el cheque, o facer comunicaos chorras y elitistes como los que fai esta institución a la que naide nun-y concede la mínima atención.
Yo quiero ser académica. ¿Aonde tengo que apuntame? Los mios méritos son apaecíos a los d’una bona riestra d’académicos/es, y nun refugué nin esbabayé na mio mocedá contra la fala d’Asturies, como dalgún/a sí que fexo.