La entrada de los estudios d’Asturianu dientro de los planes nuevos de la Escuela de Maxisteriu de la Universidá d’Uviéu vieno precedida d’una gran polémica nel mundu universitariu asturianu. El debate ciarróse nuna votación onde la mención n’Asturianu ganó con una mayoría curiosa. Gloria Téllez, directora de la Escuela de Maxisteriu, esplica la so visión de tol procesu nesta entrevista con Les Noticies.
¿Cree usté que la mención ye abondo pa formar a los docentes futuros?
Qué va. Nin esa mención, nin la de Llingua Estranxera, nin la d’Educación Física, nin la d’Educación Musical. Déase cuenta de que son cuatro o cinco asignatures y eso nun ye abondo pa nenguna, non solo pa la de Llingua Asturiana. Pue que pa ésta sía peor tovía, porque na d’Asturianu parten de cero, nun saben nada. Ye una llingua que nun s’utilizó. Los de Llingua Estranxera vienen del nivel que tienen nel bachilleratu, polo menos. Pero nun ye abondo.
La idea que se tien de los próximos planes d’estudiu, del títulu de grau, ye que ye una formación xeneralista. Lo que s’incluyó son los itinerarios o menciones, que reforzaron un poco una área de conocimientu, pero más nada. Porque delles veces piénsase que ye una especialidá, y nun ye asina, porque les especialidaes desaparecieron. Por exemplu, cuando llega’l momentu de facer oposiciones fáense por Infantil y por Primaria. Desaparecen les especialidaes. Lo único ye que-y va valir al alumnu nel suplementu del títulu européu, qu’a apartir d’agora va poner, por exemplu, mención en Llingua Asturiana.
Esto ye bien poco y siempre digo que ye una pincelada. Pa que fora una especialidá había tener polo menos un cursu completu, lo qu’equival a diez asignatures. D’esa manera sí, pero con cuatro o cinco asignatures, non. Porque, amás, agora dase la opción, dientro de les menciones, d’escoyer una asignatura, quier dicise, la mención son cuatro asignatures más una, menos na d’Asturianu, que son cinco asignatures ciarraes. Agora mesmo ye impensable plantear una mención con diez asignatures. Eso, polo menos, hasta que nun haya otru cambiu d’equi a venti años…
¿Qué asignatures va tener la mención en Llingua Asturiana?
Les de Llingua Asturiana I, Llingua Asturiana II, Lliteratura Asturiana, Didáctica de la Llingua Asturiana I y Didáctica de la Llingua II. Eses son les cinco asignatures que s’aprobaron pa la mención y ye’l mesmu planteamientu qu’hai nes Llingües Estranxeres.
Na so opinión, ¿tien que ser esta escuela la que forme a los futuros maestros d’Asturianu?
Entiendo qu’hasta agora se taben formando al traviés de los cursos d’Estensión Universitaria qu’había y que yeren un poco complexos. El problema que yo veo ye que ye una asignatura optativa y tán dándo-y el mesmu pesu qu’a les árees de conocimientu; entós, d’ehí vien esa presión que comenté. De mano, teníen que se formar nun centru como esti.
Depués ta la cuestión de da-y el pesu o non d’una mención. D’una parte, sí, porque tien que ser nun centru de formación. Y d’otra, non, porque ye un poco contradictorio, dende’l mio puntu de vista, que s’enseñe una llingua que se supón que ye nuestra y que tenemos qu’aprender y nun la aprendemos en casa. Yo creo que les llingües apriéndense en casa. Lliteralmente, hai que les mamar.
¿Nun-y parez que los asturianos sí que mamamos la llingua, como usté diz, pero que precisamente falta esi aprendimientu na escuela na mesma escala que’l castellanu?
Yá… pero yo creo qu’Asturies ye fundamentalmente castellanofalante. Eso tenemos que lo reconocer. Sobre manera nos núcleos urbanos; depués, nos núcleos rurales nun ye tanto, pero, claro, ehí tienen les sos variantes y hai sitios onde nun quieren otru asturianu. Munches veces fálase d’una regularización o normalización d’eses zones rurales y la xente nun quier. L’asuntu ye mui delicáu cuando la llingua se fala en casa… Eso otro manca a veces, porque la xente ye mui sensible nesi sentíu. Creo que’l tema va ser mui complicáu.
(de Les Noticies, 23-04-2009)
Tierra alantre, la mesma fala 
Vaya negacionista. O sea que n’Asturies nun se fala asturianu y los que falen nun se quieren escolarizar. Y la xente entra na universidá ensin conocimientu nengún d’asturianu ¿Nun sabe esta señora que yá se da asturianu en secundaria y bachiller? ¿Y qué nivel d’inglés tienen los maestros d’esa asignatura? ¿Cuánto dirá que nun pisa una escuela la señora López Téllez?