La Oficina Municipal de la Llingua del Conceyu de Xixón presentaba ayeri nos sestos Alcuentros de Mocedá «Saca la Llingua» una iniciativa bien prestosa pa promocionar la llingua asturiana ente esi sector de la sociedá.
Trátase d’un karaoke conteniendo dellos de los cantares más conocíos de la música fecha n’asturianu de los últimos años: “Tengo de rondar to valle” y “So vaqueiru”, pieces tradicionales popularizaes pol dúu Nuberu; “Chacho” y “Nun yes tu” del grupu de Tolivia (Llaviana) Los Berrones; la versión del mui popular “Chalaneru” fecha a comuña ente los hermanos Tejedor y el cantante Chus Pedro; “Rapaza nacionaliega” y “Canciu d’amor” de la banda avilesina de rock Dixebra; “Mexé na caleya”, composición que se fixo mui famosa hai unos años perteneciente a La Bandina; “La capitana”, ún de los cantares más populares del músicu xixonés Carlos Rubiera; “Sonia” y “Los suaños, suaños son” de la formación de ska-punk de Candás Skama la Rede; y el tema de l’agrupación infantil Xentiquina “Bocadillu rock”.
Toles pieces fueron grabaes otra vez en formatu karaoke, ye dicir, ensin incluir la voz y d’una manera que seya lo más facil pa poder cantales. Los músicos que participaron son bien conocíos de la escena asturiana, pertenecientes a formaciones de folk y rock y con una esperiencia bien allargada nel tiempu: Sergio Rodríguez (guitarres y baxu –Dixebra-), Israel Sánchez (batería –El Sueño de Morfeo-), Rubén Bada (guitarres –DRD, Dixebra-), Diego Pangua (flauta y gaita –Felpeyu-), Rubén Álvarez (guitarres –Herbamora-), Ramón Morán (teclaos –Herbamora-) y Miguel Herrero (trompeta –Los Redentores, Los Tashtornados-).
(de la Estaya d’asturianu de la RTPA, 29-04-2009)
Tierra alantre, la mesma fala 
Deixar ua Respuosta