L’Academia de la Llingua Asturiana vien espublizando dende la so constitución (1983) el boletín llamáu Lletres Asturianes que, col llabor de toos estos años, convirtióse nuna revista prestixosa nel ámbitu de la llingüística internacional, especialmente ente la estudiosa de les llingües romániques. Apocayá aparecía’l númberu 100, lo que ye tou un llogru pa les publicaciones d’esti calter.
Al llegar estes feches, como complementu a la celebración del Día de les Lletres Asturianes, l’Academia tien el vezu d’asoleyar un volume del so boletín dedicáu dafechu a la creación lliteraria n’asturianu que se fai nel momentu. A partir d’agora esi númberu especial conviértese nuna publicación independiente, qu’entama un camín propiu y específicu, col nome de Lletres Lliterariu; una revista con entidá propia de la que va aparecer un númberu por añu.
Na primer entrega de Lletres Lliterariu aparecen poemes de Manuel Asur, Xurde Álvarez, Lourdes Alvarez, Lauren García o Marta Mori, ente otros munchos; rellatos de Vicente García Oliva, Xe M. Sánchez, Roberto González-Quevedo o Esperanza Mariño Davila; una obra de teatru curtia de Xaviel Vilareyo; y traducciones d’autores como Kavafis, Pedro Gálvez o Juri Talvet.
(de la Estaya d’Asturianu de la RTPA, 12-05-2009)
Tierra alantre, la mesma fala 
Deixar ua Respuosta