L’Academia de la Llingua Asturiana ta acabante publicar tres cartafueyos nuevos de la so colección dedicada a estudiar y recuperar la toponimia tradicional asturiana. Nesta ocasión, estos tres númberos (124, 125 y 126) tán centraos nel conceyu de Carreño, concretamente nes parroquies de Carrió, Prevera y El Pieloro. Los sos autores son dos filólogos mozos del mesmu conceyu de Carreño: David Fernández Fernández y Xurde Fernández Fernández, esti últimu escritor de llibros de rellatos como Volver o de noveles como La espera. Nes páxines d’estos exemplares nuevos de Toponimia alcontramos los nomes de los llugares que marquen la xeografía d’eses tres parroquies.
Según l’Academia, nesta colección arrecuéyense los nomes de llugar asturianos al traviés de la tradición oral, con una descripción curtia de caún d’ellos gracies a les informaciones de bonos falantes y conocedores de la xeografía. Los datos que van asoleyándose nestos cartafueyos van valir pa que, nel so día, pueda espublizase una obra xeneral del dominiu llingúísticu asturianu que pueda llevar de nome Corpus Toponimicum Asturiarum, onde van inxertase los datos documentales amañosos pa un bon estudiu llingüisticu, históricu y antropolóxicu.
Otramiente, l’Academia de la Llingua encamienta a toes aquelles persones interesaes que manden toles observaciones qu’al respective d’estos trabayos-yos parezan necesaries.
(de la Estaya d’Asturianu de la RTPA, 08-07-2009)
Tierra alantre, la mesma fala 
Deixar ua Respuosta