L’Academia de la Llingua edita los Premios Uviéu

L’Academia de la Llingua Asturiana ta acabante de facer llegar a les llibreríes los dos volúmenes correspondientes a los Premios Uviéu del añu 2007. Concretamente nel apartáu de poesía’l ganador d’aquella edición foi’l poemariu titulau El doble blancu de Xandru Fernández, mentes qu’en narrativa’l primer premiu foi pa la novela Música d’amor en guerra de Pablo Rodríguez Medina.

Xandru Fernández (Turón, 1970) vuelve a la poesía, depués de dellos años de silenciu, con El doble blancu, una obra enllena de realidá, de versos amorosos que de xuru nun sedríen a caber nuna historia narrativa. Ente la so obra narrativa destaquen les noveles El club de los inocentes, El suañu de los páxaros de sable o La banda sonora del paraísu, tien tocao xéneros como l’históricu o’l «negru».

Pablo Rodríguez Medina (San Andrés de Llinares, 1978) con Música d’amor en guerra cuéntanos una parte de la historia del sieglu XX al traviés de la biografía y los güeyos d’August Köhler, pianista al que yá nun-y queda munchu tiempu pa contar la so vida. Ye llicenciáu en Filoloxía Hispánica, especialista en llingua asturiana, tien publicaes bien d’obres tanto n’asturianu como en castellanu, coles que llogró dellos premios en xéneros como la novela, la poesía o’l teatru.

(de la Estaya de la Llingua de la RTPA, 12-07-2009)