IVÁN G. FERNÁNDEZ
Hai unos díes, el Conseyu de Gobiernu aprobaba la oficialización de la toponimia tradicional del conceyu de Parres, qu’inclúi como única denominación pa la capital del conceyu Les Arriondes, en cuenta d’Arriondas, que yera la forma oficial hasta agora. Col de Parres, yá son cuarenta los conceyos qu’hasta agora aprobaron la toponimia tradicional y, según la Conseyería de Cultura y Turismu, hai otros 20 que yá principiaron el procesu de revisión de los nomes tradicionales de los sos pueblos y parroquies.
Cada vez qu’un conceyu oficializa la so toponimia, delles voces critiquen o nun tán d’alcuerdu con esti o con aquel topónimu. Esta situación nun ye una escepción nel nuestru país, porque, por exemplu, en Galicia, de la qu’entamaron recuperar la toponimia tradicional, nun foron poques les voces que s’oponíen a cambiar ún o otru topónimu. Nesti tipu de polémiques enfréntense dos postures. D’un llau, tán los que defenden recuperar la forma tradicional de los nomes de los pueblos y parroquies y, d’otru, los qu’inoren el trabayu que tán faciendo los investigadores y piensen que namás se tán asturianizando artificialmente los topónimos que yá hai.
Llinu Álvarez Santidrián ye ún d’esos profesionales que se dediquen a la investigación y recuperación de la toponimia tradicional n’Asturies y, amás, ye collaborador de la Xunta Asesora de Toponimia y formador d’encuestadores. Según Álvarez Santidrián, la idea que s’esparde ente la xente «ye que tamos asturianizando los topónimos». La verdá ye que nun s’asturianiza nada, nel sentíu de que «nun tamos traduciendo nengún topónimu», aclaria. Los collaboradores y encuestadores que trabayen pa la Xunta Asesora de Toponimia -xente que se dedica a caleyar pelos pueblos y parroquies y a buscar los nomes tradicionales, cuasi de manera desinteresada- faen un trabayu de campu con una serie de pasos, ente los que ta contrastar la información recoyida nesi trabayu de campu. El fin últimu ye facer un informe que s’entrega a la Xunta de Toponimia, que ye la qu’avala esi conteníu y lu tresllada al conceyu correspondiente, pa que finalmente-y dea’l preste al informe y depués lu oficialice’l Conseyu de Gobiernu.
(de Les Noticies, 11-09-2009)
Tierra alantre, la mesma fala 
Pa mí lo más grave nun ye esa xente que critica’l cambiu, esos van tar siempre ehí y participen na mayoría de les veces d’una ideoloxía clara. Lo normal ye que la xente nun mire pa ello, que-yos dea más si cambia o dexa de cambiar.
Pero lo grave ye qu’entovía nun vi (espero enquivocame) un partíu asturianista defendiendo esto. Critícase que los conceyos qu’aprueben la toponimia depués nun fain nada por cambiar los carteles y demás midíes básiques. ¿Presentó dalguna persona-partíu dalgún escritu nel so Conceyu pidiendo que se cumpliera cola legalidá? ¿Nun tienen la mesma culpa los unos que los otros?