Güei a les 12 hores presentóse na sede de la Conseyería de Cultura y Turismu del Principáu d’Asturies el programa del I Festival del Llibru Infantil y Xuvenil, que va facese en Villaviciosa (Patiu de les Escueles Graduaes).
L’eventu va tener lles sos puertes abiertes dende’l xueves 15 hasta’l domingu 18 d’ochobre y va acoyer una gran variedá d’actividaes, que van incluir la presentación d’obres de publicación recién; la realización de talleres cola participación d’escritores asturianos; la celebración de conciertos didácticos y actuaciones musicales; sesiones de teatru infantil y cuentacuentos… La Comarca de la Sidra, co-organizadora, tien un pesu especial con diverses actividaes rellacionaes cola comarca, mesmo que’l Gremiu d’Editores d’Asturies, que va esponer les últimes novedaes del mercáu editorial, que van poder mercase con un 10% de descuentu.
La celebración d’actuaciones de maxa o la posibilidá de prebar el xuegu didácticu Colás y Xana. Vivir n’asturianu son otros de los atractivos que va ufrir el Festival, que convoca a un públicu infantil, xuvenil y adultu a descubrir y redescubrir los llibros y los mundos creativos que d’ellos se deriven.
Demientres les dos primeres xornaes del Festival -xueves 15 y vienres 16- ta programada la visita d’escolares de los centros educativos de la Comarca de la Sidra. Un total de 1000 alumnos de 12 centros van participar nes actividaes programaes y van poder tomar parte nel “I Concursu de Relatos Ilustraos n’asturianu”, del que los premios van entregase na mañana del domingu.
ANEXU: Programa d’actos
(de la Dirección Xeneral de Política Llingüística, 13-10-2009)
Deixar ua Respuosta