Pela carpa asitiada nel patiu de les Escueles Graduaes de Villaviciosa pasaron estos cuatro díes (del 15 al 18 d’ochobre) más de 1000 neños y neñes de distintes edaes que pudieron participar nes sesiones de cuentacuentos, talleres musicales y lliterarios, esposiciones y demás actividaes programaes. Los escolares pertenecíen a los tres institutos d’Enseñanza Secundaria (IES de Lluces, “Peñamayor” de Nava y IES de Villaviciosa) y a los centros d’Educación Primaria de la Comarca de la Sidra (los Colexos Rurales Agrupados de “La Coroña” y “La Marina” y los colexos “San Rafael”, “San Bartolomé”, “Martimporra”, “Braulio Vigón”, “Matemático Pedrayes”, “Salvador Vega Berros” y “Maliayo”).
Además, na convocatoria del “I Concursu de Relatos Ilustraos n’asturianu” participaron unos 800 alumnos de 3.º, 4.º, 5.º y 6.º de Primaria y 1.º y 2.º d’ESO d’once d’estos centros educativos.D’otra banda, demientres el tiempu que tuvo abierto al públicu nos sos cuatro díes de duración, cientos de persones visitaron les instalaciones del Festival y disfrutaron de les actividaes programaes (presentaciones de llibros, esposiciones, teatru y conciertos musicales).
El Stand del Gremiu d’Editores d’Asturies, qu’axuntaba títulos de lliteratura infantil y xuvenil n’asturianu de nueve editoriales de la nuestra comunidá, foi ensin dulda nenguna’l sitiu más visitáu, con un bon índiz de ventes directes al públicu, a lo qu’hai qu’añader la so función d’escaparate de la producción editorial en llingua asturiana.
El llibru más vendíu foi’l tituláu Arroz, agua y maíz, de Berta Piñán, galardonáu col Premiu “Mª Josefa Canellada” de Lliteratura Infantil y Xuvenil convocáu nel 2008 pola Conseyería de Cultura y Turismu, que lu coeditó cola Editorial Pintar-Pintar. Coles mesmes, ente los más vendíos tán los títulos que se presentaron nel Festival: Menú de versos d’Esther García (Editorial Pintar-Pintar), Bruxes males, bruxes bones de Francisco Pimiango (Publicaciones Ámbitu), Animalinos, Animalaes, Los animales y La primavera de Sabel Tuñón y Lurdes Álvarez (Publicaciones Ámbitu) y ¡Cómo te güelen los pies! de Mª Luz Pontón (Editorial Trabe).
(de la Dirección Xeneral de Política Llingüística, 19-10-2009)
Deixar ua Respuosta