La escena de rock n’asturianu, que dende hai dalgún tiempu vien surdiendo adulces, parez que va afitándose con seguridá. Si hai unos años yera bien difícil falar d’un movimientu d’estes característiques, anguaño pue constatase la existencia d’un númberu de bandes, coincidentes nel tiempu, bien bultable.
Frutu del dinamismu que tán protagonizando estes formaciones van ser les producciones discográfiques que preparen pa presentar nesta temporada de seronda-iviernu. Los primeros na llista de próximos llanzamientos son los veteranos del rock n’asturianu, Dixebra, que tán a puntu d’espublizar el so discu nuevu (que fai’l númberu diez na so carrera), Amor incendiariu, y que presenten el domingu 1 de payares en Llanes. A ellos van siguir La Tarrancha, formación de ska-reggae que nestos díes tán grabando’l que va ser el so primer discu, tituláu O-3-3, depués d’espublizar una maqueta; la formación xixonesa de punk-folk Sambre, qu’anteriormente incluyeron dalgún tema sueltu en discos recopilatorios; el grupu de punk-rock uviedín Gomeru tamién van tener discu nesta seronda, col títulu xenéricu de Llume, y que sigue la llinia entamada coles sos maquetes anteriores; pela so parte, los moscones Misiva van ufiertar una entrega nueva del so punk-metal; lo mesmo que los inventores del agro-rock, Los Berrones, que yá tienen grabáu’l so próximu trabayu discográficu, con salida al mercáu enantes d’acabar l’añu.
Estes son les producciones inmediates, pero’l rock n’asturianu muévese como nunca, y a elles hai qu’añadir les noticies que lleguen d’otres formaciones como Skontra o Skama la Rede. Los primeros tán acabante colgar nel so myspace un tema nuevu, Llicenciáu en barricaes (versión de la banda riosana Avientu, activos na década de los 90); y los segundos tán preparando les canciones que van componer el so tercer discu, siempre na so llinia avezada de ska-punk.
(de la Estaya d’Asturianu de la RTPA, 31-10-2009)
Tierra alantre, la mesma fala 
Deixar ua Respuosta