El Centru Asturianu de Madrid ta acabante espublizar nun volume les dos obres ganadores del VII Concursu de Rellatu Curtiu n’Asturianu Xosé Álvarez que convoca esta entidá anualmente. Nel llibru recuéyense los rellatos «Ferre o palomba» (ganador), del maliayu Lluis Portal Hevia, y «L’Abadía» (accésit), del xixonés Pablo Rodríguez Alonso.
«Ferre o palomba» sitúa l’acción nos instantes previos a la Guerra Civil y tien como protagonista a un mozu sindicalista que busca venganza pola muerte de so pá a manos de falanxistes. Por ello, el mozu va trabar amistá con un xefe de la Falanxe cola intención de garrar les armes qu’esta organización tenía. L’autor ufierta al llector una historia mui descriptiva centrada nes apariencies y que cuenta con un final mui abiertu.
La otra obra premiada, «L’Abadía», trátase d’un rellatu más llargu que tien dos partes bien diferenciaes. Na primera, l’autor fai una especie d’ensayu sobre’l conceptu d’historia al traviés de la figura d’un arqueólogu de la Universidá d’Uviéu que ta trabayando nel estudiu de la ilesia de Santu Adrianu de Tuñón. Con un rellatu enllenu de misteriu, Rodríguez Alonso centra la segunda parte de «L’Abadía» na aparición d’una inscripción nuna piedra del templu que-y permite reflexonar sobre lo socedío nel llugar nel pasáu.
(de la Estaya d’Asturianu de la RTPA, 1-11-2009)
Tierra alantre, la mesma fala 
Deixar ua Respuosta