Pablo Antón Marín Estrada gana’l Xosefa Xovellanos

L’escritor Pablo Antón Marín Estrada ye’l ganador del Premiu Xosefa Xovellanos d’esti añu gracies a la novela Mientres cai la nueche, que presentó al concursu col seudónimu d’Iván Solís y que centra la so atención nes peripecies de los fugaos que s’echaron al monte pa lluchar contra’l franquismu. Ye la segunda vez que Marín Estrada gana’l Xosefa Xovellanos, un premiu que yá conquistara nel añu 1998 cola novela La ciudá encarnada.

El xuráu –compuestu polos escritores Taresa Lorences, Miguel Rojo y Miguel Barrero y presidíu por Consuelo Vega (directora de Política Llingüística), con María Antonia Pedregal como secretaria– decidió concede-y el premiu a esta novela pola so combinación de rigor documental y pericia narrativa, ensin desdexar ciertos matices poéticos, y tamién pol usu audaz d’una estructura que va meciendo delles voces pa trencar una historia que fala de la memoria y de cómo ésta va recomponiéndose al traviés de la ficción. El tribunal quixo destacar especialmente, d’ente les ocho obres que quedaron finalistes del certame, la que llevaba por títulu La empresa, yo y casame, onde al traviés d’un humor próximu al costumismu acaba faciéndose una crítica social hacia los vicios de la clas media asturiana de los nuestros díes.

Pablo Antón Marín Estrada (Sama, Llangréu, 1966) ye ún de los escritores más destacaos de la lliteratura asturiana. Hai dos años ganó’l premiu Acebal de poesía cola obra Animal estrañu, y na so trayectoria figuren títulos como’l poemariu Blues del llaberintu o’l volume de rellatos Esa lluz que naide nun mata. A primeros d’esta década publicó en castellanu’l volume El amor de La Habana, y nel 2007 ganó’l Premiu de Narraciones Trabe cola novela La boca puerca.

(de Les Noticies, 17-11-2009)