El sábadu 30 de xineru, a partir de les 20:30 hores, nel Teatru Xovellanos va celebrase la segunda edición de la gala Xixón fala n’asturianu, entamada pola Conceyalía de Cultura Tradicional y Llingua Asturiana. Nella van axuntase dos disciplines artístiques como son la música y el teatru, coles actuaciones d’Ismael Tomás, Rafa Lorenzo, Chus Pedro y Manolo Peñayos, Dixebra y A Baxu Coste Teatru.
Va abrir esta gala’l cantador Ismael Tomás, una de les voces de la tonada con más prestixu y sonadía, ganador d’abondos concursos y con dellos discos publicaos. Depués d’él van salir al escenariu del recién remocicáu Teatru Xovellanos el cantautor de Tinéu Rafa Lorenzo, ún de los históricos del Nuevu Canciu Astur, con bien de discos nel mercáu y un procuru especial pola cultura vaquera; Chus Pedro y Manolo Peñayos (acompañaos por Gabino Antuña a los teclaos) van ufiertar una actuación esclusiva depués de la desaparición del grupu Nuberu; pela so parte, Dixebra (encargaos de zarrar la gala) va interpretar dellos de los cantares del so últimu discu, Amor incendiariu.
Na parte teatral van intervenir A Baxu Coste Teatru, dúu formáu pol actor Carlos Alba (conocíu por personaxes como Cellero y El Pola, colos que renovó’l xeneru del monólogu tradicional asturianu) y el músicu Rafa Kas (ún de los guitarristes más conocíos de la escena del país), que van poner nes tables dellos sketchs ambientaos nos años últimos de los 70 n’Asturies. Xixón fala n’asturianu va tar presentada pol actor Toño Camaño (de la compañía Nun Tris), qu’amás va facer tamién dellos monólogos.
(de la Estaya d’Asturianu de la RTPA, 29-01-2010)
Tierra alantre, la mesma fala 
Deixar ua Respuosta