D. BARREIRO
“Santina de Cuadonga, ayúdamos nel camín pa llegar al to fíu; préstame tanto llegar hasta vosotros”. Asina, n’asturianu, finó ayeri Miguel Sanz la so toma de posesión como Arzobispu.
Unes poques pallabres, namás un actu simbólicu, pero paez un pasu alantre na rellación ente l’Arzobispáu y la llingua asturiana. Ye de reseñar, qu’un de los primeros actos del so predecesor, Carlos Osoro, namás llegar al cargu foi prohibir usar l’asturianu na lliturxa del funeral del xesuita Federico Fierro-Botas, presidente del coleutivu Manuel Fernández de Castro, asociación que trabaya pol usu de la llingua dientro de la ilesia.
Precisamente’l presidente actual d’esi coleutivu, José María García de Jesús, dicía fai unos meses nuna entrevista a esti diariu qu’había que da-y un votu de confianza a Sanz Montes y dexar a un llau la so etiqueta de conservador, yá que nun sabíamos nada de la so posición no llingüísticu.
“A vegaes falamos del asturianu como una cuestión d’esquierdes y nun ye asina. Cuando tome posesión del so cargu, el Coleutivu va tresllada-y les sos demandes de compromisu cola llingua y cola cultura asturiana, en función de cómo vaigan evolucionando les coses diremos si respuende”, señalaba n’Asturies.com.
Un compromisu cola llingua, que según esplicaba García de Jesús, consistía na oficialización de los testos llitúrxicos, “que tienen que ser aprobaos pola Santa Sede, pero que dependen muncho del puxu que-y ponga l’Arzobispu, que ye quien lo tien que presentar, y un compromisu d’accesu de los asturfalantes a la lliturxa na so llingua”.
Queda por ver si’l nuevu Arzobispu, que dixo que venía a Asturies ensin conseñes, ensin planes conspiraos y ensin estratexes torcíes, va siguir faciendo usu del asturianu dientro de la lliturxa o namás va quedar nun actu aislláu.
(d’Asturies.com, 31-01-2010)
Tierra alantre, la mesma fala 
Deixar ua Respuosta