La XXXI Selmana de les Lletres Asturianes va tar dedicada al escritor mierense Xosé Antonio García (1961-1998), creador representativu del Surdimientu y qu’ocupa un sitiu preferente na lliteratura asturiana de la segunda metá del sieglu XX.
Xosé Antonio García desenvolvió una intensa actividá cultural dende los años setenta y collaboró activamente en revistes lliteraries y en prensa. Amás, dirixó dellos programes de radio y participó nel mundu editorial. En poesía tien publicaos dos llibros: Cuartetu de la criación (Casa de Cultura Teodoro Cuesta, 1989) y Alcordances d’un home muertu (Editora del Norte, 1995). Anque dexó inédita producción narrativa, tanto n’asturianu como en castellanu, ye principalmente un poeta figurativu, existencialista, y que reflexona sobre la condición humana y la muerte.
La Conseyería de Cultura y Turismu, al traviés de la Dirección Xeneral de Política Llingüística, ta trabayando nel programa d’actos de la XXXI Selmana de les Lletres, cola participación de dellos colectivos, instituciones, creadores y investigadores, como’l poeta José Luis Argüelles, y la filóloga Laura Rodríguez Solís, que trabayen na compilación y estudiu de la obra lliteraria de Xosé Antonio García.
L’oxetivu final del llabor d’estos investigadores y del homenaxe na Selmana de les Lletres del 2010 ye recuperar y divulgar a un autor y una época, xuntando’l so nome a la nómina de los clásicos de la llingua asturiana de los que se fixo alcordanza n’ediciones anteriores: Teodoro Cuesta, Pepín de Pría, Fernán Coronas, Xosefa Xovellanos, Antón de Marirreguera, María Xosefa Canellada o Enriqueta González Rubín.
La Selmana de les Lletres Asturianes va celebrase nos primeros díes de mayu, como ye vezu, y con ella quier facese un reconocimientu institucional y ciudadanu a la lliteratura en llingua asturiana, tal como s’informa dende la Conseyería de Cultura. «Tanto pol so carácter simbólicu como pola so contribución a la investigación y divulgación de la obra d’autores clásicos n’asturianu, la Selmana de les Lletres Asturianes ye ún de los actos culturales más importantes del añu», remárcase dende’l Gobiernu.
(de Les Noticies, 01-02-2010)
Tierra alantre, la mesma fala 
Deixar ua Respuosta