Cásique un millar de competidores de tol país van alcontrase nel Campionatu d’España de Duatlón 2010, que se va disputar en Xixón los díes 17 y 18 d’abril. Un alcuentru deportivu nel que l’asturianu tien un sitiu propiu na información y na propaganda de la convocatoria, fecha en castellanu y n’asturianu.
Va ser la cita con más participación de la historia nesta especialidá, según anunció’l presidente de la Federación Española de Triatlón, l’estremeñu José Hidalgo. La prueba asturiana va valir como test pal Mundial de Duatlón de Xixón 2011.
Na presentación de la competición, celebrada’l 29 de marzu pasáu na Casa Conceyu de Xixón, Hidalgo señaló que «nestos tiempos de crisis económica que vivimos nun ye habitual atopar patrocinadores pa sofitar iniciatives d’esti caláu», polo que mostró’l so agradecimientu públicu a tolos que comprometieron perres y recursos pa facer realidá’l Campionatu.
El presidente de la Federación Española de Triatlón amestó que la ciudá más poblada d’Asturies ufierta un marcu amañosu p’agospedar esta prueba y el Mundial que se va celebrar en setiembre del añu qu’entra. «El nuestru ye un deporte que nun se disputa n’estadios. Los nuestros estadios son les cais y les places de les ciudaes que lu acueyen. Nesi sen, ye una suerte poder contar con Xixón, un escenariu que vamos mostrar a España y al mundu».
Laura Tuero, de la Federación Asturiana de Triatlón, informó de que, por cuenta del Campionatu d’España, «va haber que ciarrar al tráficu una parte importante de la ciudá». El circuitu pa la categoría élite va trescurrir ente’l Complexu Deportivu Municipal Les Mestes y el Muru de San Llorienzo (el paséu marítimu), mentes que pa los grupos d’edá va espardese pela parte este del conceyu hasta L’Alto l’Infanzón.
Pela so parte, el conceyal de Deportes de Xixón, Ramón Tuero, apuntó que la prueba «va contar con recorríos mui vistosos y interesantes, con epicentru en Les Mestes, que ye un complexu espectacular. Va ser el test pal Mundial y el nuestru oxetivu ye dir corrixendo pal añu qu’entra los errores que se puedan dar nesti alcuentru».
Otra manera, el director xeneral de Deportes del Gobiernu asturianu, Misael Fernández Porrón, felicitó a la Federación Asturiana pol «aumentu nel númberu de federaos esperimentáu nos dos últimos años» y recordó que la ciudá tamién va acoyer en xunu’l Campionatu d’España n’Edá Escolar de Triatlón, lo que muestra que dende la territorial «trabáyase non solo pa entamar eventos como’l Campionatu d’España, sinón tamién pa facer medrar la cantera».
(de Les Noticies, 06-04-2010)
Deixar un comentairo