La XXXI edición de la Selmana de les Lletres Asturianes, dedicada al escritor mierense Xosé Antonio García –ún de los poetes más importantes de la Segunda Xeneración del Surdimientu–, arrincó’l 3 de mayu nel salón d’actos de la Casa la Cultura de Mieres. La conseyera de Cultura, Mercedes Álvarez y l’alcalde del mesmu conceyu, Luis María García García, inauguraron los actos oficiales.
Xunto a los mentaos, tamién tuvieron presentes Consuelo Vega, directora xeneral de Política Llingüística; Ismael García Arias, director de la Casa la Cultura de Mieres; Diana G. Fernández, conceyala de Cultura; y los responsables del llibru Poesía, José Luis Argüelles y Laura Rodríguez Solís, obra coeditada pola Conseyería de Cultura y la editorial Trabe onde s’inclúi la reedición de los poemarios que Xosé Antonio García publicó en vida y a los que s’axunten un conxuntu d’escritos publicaos en delles revistes o otros totalmente inéditos.
El primeru n’intervenir foi Luis García, qu’aprovechó pa reconocer que’l fechu de que la cita más importante cola llingua asturiana tea dedicada a la figura del escritor mierense «ye un reconocimientu que fai xusticia, porque-y da’l méritu que merez». Amás, l’lalcalde recordó que la trayectoria de Pin –como popularmente yera conocíu Xosé Antonio García– «tien muncho que ver con esti conceyu». Al mesmu tiempu emponderó’l trabayu del escritor y tamién el de los dos autores de la edición de la so poesía completa. Enantes de dar pasu al director de la Casa la Cultura, Luis García invitó tanto a los mierenses como a tolos asturianos «a averase a Mieres pa disfrutar de les actividaes organizaes pa conmemorar esta selmana tan importante pa la llingua asturiana».
Ismael García Arias espresó la so satisfacción «porque esti actu tea dedicáu a un amigu» y a continuación fixo un repasu de tolos escritores que participaron na ellaboración del llibru dedicáu a Pin: Xosé Antonio García, un poeta nel fin de sieglu. Sobre manera, destacó la participación del artista Nel Amaro, «el pá de toos nosotros», comentó’l director de la Casa la Cultura.
De siguío, intervinieron los autores de la poesía completa de Xosé Antonio García.
(de Les Noticies, 03-05-2010)
Tierra alantre, la mesma fala 
Deixar ua Respuosta