Xosé Lluís García Arias: “Lo más importante ye escribir y escribir bien iguao. Onde asitie la hestoria a caún va quedar bien lloñe”

LLUIS PORTAL

Xosé Lluis García Arias fue un de les persones qu´entamaron el movimientu de vindicacion llingüística, primer presidente de l´Academia de la Llingua, Catedráticu de Dialectoloxía de la Universidá d´Uviéu, y de xuro que la persona que más sabe sobre filoloxía asturiana. Ye una de les voces más clares y contundentes en favor de la normalización del bable, por eso les sos opiniones son siempre autorizaes.

Un de los aspectos positivos que s´apunten ye la esistencia d´un relevu xeneracional.
Nun sé si hai relevu xeneracional anque lo normal ye que surda xente nuevo y escriba. Ye más, la cuestión de les xeneraciones fádiame enforma porque da la impresión, dende hai munchos años, que ye´l gran asuntu de la lliteratura asturiana. Pero, home, na Facultá de Filoloxía falen de más coses interesantes que de les xeneraciones lliteraries. A los esmolecíos por esta cuestión lo único que podría aconseyáse-yos ye que persepan que lo más importante ye escribir, y escribir bien iguao. Ónde asitie llueu la hestoria a caún va quedar bien lloñe y, amás, resultará incontrolable.

Sube la producción editorial pero baxa´l númberu de llectores. ¿Tienen los escritores responsabilidá nello o ye daqué circunstancial?Los que nagüen por facese un nome na nuesa lliteratura namái tienen un responsabilidá nesti sen: crear y dar calce, con una escritura bien fecha, a lo que ye la so inspiración. A partir d´ehí que cada palu aguante la vela. Nun sé cómo se miden los llectores nin la fondura d´eses llectures. Ye más, cuéstame muncho enfotame nes cifres, dacuando interesoses, que s´esparden per ende.

¿Ye posible que les subvenciones a la producción lliteraria conviertan al llector nun elementu secundariu, inclusu irrelevante?Abenayá que digo que les subvenciones son necesaries nuna llaceriosa situación como la qu´arrodial´l mundu llingüísticu asturianu. Dicho esto, como ciudadanu prestaríame que, d´una vez, s´imponga la racionalidá y el control nel repartu del dineru público. Nidiamente, nun ye lo más amañoso tener escritores del réxime o que defendan el réxime porque-yos va nello la so caltenencia. Menos mal que munchos saben aguantar la xaraza y mantienen el tipu.

Escríbese cada vez más pero fálase cada vez menos. Resulta paradóxico.
Escribir ye un fechu que respuende a la voluntá o al interés d´unos pocos que saben ú tal motivu de la so escritura nuna llingua escoyida de mano. Lleer ta dientro d´otru procesu qu´afeuta a la totalidá de la xente y, muncho d´ello, enxamás sintió la necesidá de lleer en ninguna llingua del mundu. Nun tien un res de raro qu´un idioma al bentestate como´l nuesu, alloñáu de tou proyeutu seriu d´espardimientu ente los que sedríen los sos falantes naturales, vaya quedando arrequexáu por otru que tien a la so disposición toles posibilidaes propagandístiques. Pero esto nun ye nuevo. Vien diciéndose, acuantayá, que nun habrá llectores ensin enseñanza seria, ensin asitiamientu de la llingua nes instituciones y na vida pública. Pensar otra cosa ye nun tar no que se celebra.

Hai editores que trabayen yá cola hipótesis de que la llingua se convierta n´arqueoloxía. Según los sos planes la lliteratura sobreviría a los falantes. ¿Qué piensa d´ello?
Los editores son mui llibres de pensar, discurrir, cavilgar y esparder lo que-yos abulte de más interés. Ye más, si yo tuviere colos que tán nel poder, o averáu, diría a dellos editores lo que quixeren sentir y que podría traducise asina: “Nun vos enfotar, esa llingua na qu´editáis nun tien futuru! De toes maneres nun vos esmolecer que nosotros persabemos que ye un elementu simbólicu pa los asturianos. Por ello siguiremos subvencionando anque nun se llea. Los nuesos intereses van nidiamente per esi camín. Ye más, préstanos subvencionar y, si nun se llee, meyor. Siempre hai un sitiu pa Llanera onde asitiar la mercancía”.

El xuez Carbajo diz que Xurde Blanco ye un revolvín, y suxer que debería ser inclusu amonestáu pola Alministración.
Espero que´l xuez tenga persones que lu informen meyor que les dos o tres firmes que quixeron convencenos de les virtúes del so fallu. Dende llueu, dame la impresión que, siguiendo asina empobináu, nun va saber de qué color ye´l lloréu o, dicho otramiente, va ser difícil facer carrera d´él.

La conclusión que saca dalgún responsable políticu del casu Blanco ye que los asturianos nun quieren imposiciones llingüístiques.
Pues sí que saquen conclusiones rápides y clares. Aguardemos qu´esos analistes nun lleguen a la política porque tendríamos que nos esllarigar.

Nos primeros Díes de les Lletres el Presidente asturianu -daquella Pedro de Silva- falaba en bable. ¿Por qué se perdió tan sana tradición?
Entrúguelo a los presidentes qu´hubo de magar entós. A lo meyor ye que falar serio cuesta caro. De toes maneres nun escaezamos que los males que daquella se criticaben siguen siendo, n´esencia, los mesmos. Nun se solucionó bien nengún de los importantes.

Pídese la oficialidá de la llingua pero nun s´aprovechen les posibilidaes qu´aporta la Llei d´Usu.
Primero nun s´escaeza Usté que la llamada Llei d´Usu nació pa tapecer la conducta non favoratible a la oficialidá que caltuvieron dalgunos. En segundu llugar la llamada Llei d´Usu da poco xuegu por tener una redacción curtiamente esixente cola Alministración. Pa lo cabero, les virtualidaes que pueda tener (de xuru que dalgún aspeutu d´interés sí tien, a falta d´otra cosa), tarázales dafechu´l gobiernu y los cada vez menos efeutivos abogaos de caleya que lu acompanguen con conseyos persiempre restrictivos y, dacuando, bananeros.

Fálase de represión llingüística pero la Procuradora Xeneral diz que solo recibió una reclamación nel añu 2009.
Los asturianos tienen claro una cosa: Nun son masoquistes pa escribir a muérganos (los que seyan) que lleen poco y, a vegaes, mal y, pa enriba too, escriben curtiamente. ¿O quier Usté que cuente estes penes a quien foi conseyera del Gobierno del Sr. Rodríguez Vigil? ¿Perdimos yá la memoria?

Esti añu tomará posesión como nuevu académicu correspondiente de l´ALLA l´estudiosu lleonés Nicolás Bartolomé, ¿cuálos son los sos méritos?
Nicolás ye una persona qu´escribe y fala un asturianu mui bien iguáu. Investiga de mou afayadizu dellos aspeutos de la nuesa cultura. Tien trabayos asoleyaos qu´afecten a la conocencia de la llingua y lliteratura al sur del cordal asina como al so calter llegal. Inxerse en trabayos que cinquen a la normativización de la llingua. Ye una persona que, conociendo perbién la realidá asturiana (vive y trabaya equí), caltién bones rellaciones con grupos favoratibles al idioma naquelles tierres.

¿Hasta qué puntu ye importante lo que se fai n´otros puntos del dominiu astur-lleonés?
Nun conozo tolo que se fai nel dominiu llingüísticu ástur. La mínima prudencia esixe pescanciar que, de mano, pue ser d´interés. Lo más importante ye que nin nosotros estorbemos dende equí nin otros torguen el nuesu facer dende allá. Si ente toos somos a sumar, perbién.

¿Sorprénde-y la variedá d´inciatives que surden nel antiguu reinu de Lleón?
Non. Nun m´estraña pero, enantes de cayer na simplicación, fadrá falta xulgalo acordies con tolos datos non sólo cola propaganda. Lo importante ye que vaya too bien empobinao y se persepa qu´un mesmu idioma hestóricu ye lo que nos axunta a la xente d´un llau y otru de los cumales ástures.

¿Hasta qué puntu ye posible establecer una cierta xunidá d´acción?La cosa ye llarga y seria. Nun podría lliberame de la entruga con dos pallabres. Andagora nun hai por qué s´esprecetar nin perder la calma. Tampoco ye aconseyable perder la oxetividá y el bon xeitu.

(de La Voz de Asturias, 07-05-2010)