Col últimu númberu del selmanariu Les Noticies distribuyóse un suplementu d’ocho páxines llamáu Brixel, dedicáu enteramente a la lliteratura. Dirixíu por Xuan Bello, esti suplementu abre nesti primer númberu 0 con unes páxines dedicaes a Hugo von Hofmannsthal, poeta austríacu qu’acaba de traducir Xabiero Cayarga y que, a xuiciu del director de la publicación, «ye ún d’esos acontecimientos aislaos que, de magar s’inició’l Surdimientu, vienen produciéndose pa poner n’hora l’escuaxaringáu reló de la poesía asturiana».
A la poesía, entendida como xéneru constructor d’una sensibilidá más firme, fina y acusada, dedíquense-y en Brixel delles páxines: Antón García inaugura la sección «Vasos comunicantes», onde reseña y traduz voces d’otros ámbitos poéticos na intención d’enanchar l’horizonte d’espectatives de la lliteratura asturiana; tamién Martín López-Vega pescuda na sección «Los poetes de la duración» na materia fuxidizo de la poesía.
En Brixel la lliteratura conviértese na caxa de resonancia onde resona’l mundu. Amás de los autores mentaos, collaboren con esta nueva revista José Luis Argüelles, Vanessa Gutiérrez, José Luis Piquero, Pablo Texón y Beatriz R. Viado. Diseñáu y maquetáu por Eduardo Carruébano, cuenta con ilustraciones de David García Lezink.
Con vocación d’abrise y incorporar sensibilidaes nueves, esta publicación significa un apueste nuevu de Publicaciones Ámbitu nel mundu de la cultura.
(de la Estaya d’Asturianu de la RTPA, 28-06-2010)
Deixar ua Respuosta