“Facer teatru n’asturianu, o trabayar por definir lo que ye un Teatru Asturianu con ’denominación d’orixe’, tien de pasar per un claru compromisu cola llingua y cultura asturianes”

Entrevista a Toño Caamaño, componente de la compañía teatral “Producciones Nun Tris”:

En primer llugar, prestaríanos que mos desplicare esautamente cuálu ye’l llabor qu’implica la direición escénica y la producción, y en qué se diferencien.
La direición escénica pa min ye tolo que tien que ver col material artísticu; tanto dende la estética, el tipu de trabayu colos actores, l’ideariu… La produción vien a ser lo que ta venceyao coles perres, en xeneral; presupuestos, planificaciones… Nel nuesu casu tien abondo que ver una cola otra, yá que la produción condiciona la direición escénica, al llimitala, na mayoría los casos, al haber poques perres; y al revés tamién, porque al ser una compañía profesional qu’ufierta unos produtos determinaos pa un supuestu mercáu, hai un ideariu concretu y unes formes de trabayar específiques que marquen el tipu produciones que facemos.

Vusté ye direutor y productor de la compañía teatral “Producciones Nun Tris”. Coméntenos: ¿per qué ámbitos s’estiende l’actividá y cuála ye la so trayeutoria? ¿Tien una gran producción en llingua asturiana?, ¿y n’otres llingües?
En principiu, aclarar que la compañía formáronlos dos persones que faen de too: dende dirixir a producir, carretar trastos, actuar, vender o facer declaraciones d’IVA. Yo, pa que quede claro cuála ye la mio responsabilidá na productora, tanto Inma como yo fuimos fundadores; la filosofía de nueso yera facer una compañia d’actores, ficímoslo, y fuimos evolucionando a caltener una rellación cola compañía (que ye la productora) de trabayadores, digamos como por serviciu realizáu; unes vegaes d’actor, otres direutor, otres xestor, otres productor, otres téunicu de lluces… Agora la compañía yá nun somos dos; somos muncha xente, en mayor o menor midida; Sandra, que ta na oficina, los y les artistes, asesores, téunicos, la xente que tuvo y yá nun ta… Elles y ellos tamién son “La compañía”.

Cuando Inma y yo entamamos nel ‘92, como asociación, y yá nel ‘97 como profesionales, tábemos acabantes de salir del ITAE (Institutu del Teatru y de les Artes Escéniques), onde ficimos con casi otru centenar, los estudios d’Arte Dramáticu, especialidá d’Interpretación, estudios que nunca nun mos reconocieron. La cosa ye que daquella les compañíes que trabayaben n’Asturies profesionalmente, yeren como seyes o siete, siguíen davezu la llinia artística que marcaba’l so correspondiente direutor/a, y ufiertaben namái qu’una mena de trabayos. Nós quiximos estremanos un poco na ufierta, y asina, dende’l puntu vista d’actores, contratábemos direutores de fuera pa facer diferentes tipos de trabayu, según mos petara. Por exemplu, dirixéronmos espeutáculos xente tan estremao como José Pedro Carrión (“En el quinto cielo”); Eduardo Usillos (“Desventuras y andanzas de Villegas y Quiñones cuando en el XVII se hacían Calderones”), Anna Rita Fiaschetti, que más llueu foi compañera nuestra na ESAD (“K.” y “Cigua”), Ingrid López y Harold Zúñiga (“Albentestate”)…

Depués de dellos años quiximos evolucionar y garrar nós les riendes; anque dalguna cosa ficiéremos enantes nesi sen, tanto Inma como yo entamemos a dirixir tamién produiciones digamos de gran formatu: “Cocinando con Elisa”, “Iphigenia”, “El criáu de dos amos”… esto coincidió cola realización de los nuesos estudios de Direición na ESAD-Asturies (Escuela Superior d’Arte Dramáticu del Principáu d’Asturies). De siempres quiximos que la compañía fuera daqué abierto, una especie de barcu nel que caún o caúna tien la so misión y la so responsabildá, a diferencia d’otres que son claramente verticales; asina hebo y entá se caltién abonda collaboración con malabaristes, músicos y otros artistes, tanto pal espardimientu de los sos espeutáculos como pa collaborar nos de nueso. Nesi sen la nuesa compañía entama eventos, como mercaos tradicionales, a veces organizándolos dafechu, otres vegaes participando endientro d’ellos como animadores, o colos nuesos espeutáculos. Tamién animaciones específiques, pasucais…

Otra estaya perimportante de trabayu de la compañía, polo que representa socialmente, más que pol trabayu que xenera, ye la de teatru asturianu. Llevamos quince años faciendo espeutáculos que tean rellación cola cultura o llingua asturianes. Yá dende enantes de crear Producciones Nun Tris, como asociación cultural Teatru de Trebolén, nel ‘92, ficimos “A la gueta l’ayalga”; a esi siguieron otros munchos, como les dos Vixigones, (testos d’Inma Rodríguez), “Detente, ñube…”, “Brenga”, “De boca a oreya”, “Los socedíos de Nelón” (testu de Dolfo Camilo), la torna fecha por Lluis Portal del clásicu “El criáu de dos amos”…

La idega n’esta estaya yera facer endientru’l teatru asturianu un llabor asemeyáu al que faen los grupos de música folc; garrar material tradicional y dá-y una vuelta; más llueu, colos años y l’aprendizaxe, fuimos afitando’l nuesu llabor en pegoyos comu la mitoloxía, el metateatru y ritos asturianos, el monólogu, la rellación de la comedia tradicional asturiana cola Comedia dell’Arte, autores asturianos d’anguañu, la torna de clásicos, incluso’l teatru contemporániu (que foi un enfotu claru de nueso, por exemplu, en dellos exercicios que mos plantegaben na ESAD, y que fueron comprendíos nel so sinificáu y na so dimensión por mui poca xente). En realidá, pasu ente pasu, vamos desendolcando lo que tendría ser el llabor d’un Centru Dramáticu Asturianu, o, si quiés, como diría Dolfo Camilo, Teatru Nacional Asturianu, pero fecho dende les nueses posibilidaes, que nun son munches.

Ye más. Pienso que facer teatru n’asturianu, o trabayar por definir lo que ye un Teatru Asturianu con “denominación d’orixe”, tristemente, güei tien de pasar per un claru compromisu cola llingüa y cultura asturianes; tamos minorizaos, nun tamos en condiciones de poder facelo d’otra forma; tamién desixe trabayalo con seriedá y afitándose’n metodoloxíes y téuniques específiques. A mín nun se m’ocurriría facer teatru n’asturianu ensin ser favoratible a la oficialidá de la llíngüa, por exemplu, o namái que pola mor d’algamar otros mercaos. Pienso que tenemos de ser consecuentes colo que facemos y cola realidá cultural y llingüística minorizada d’esti país; sinon facer esti llabor nun tien sen social dengún. Caún fai lo que-y peta, ye llibre pa ello, y oxalá hebiera les condiciones pa que facer teatru n’asturianu fuere lo más normal, pero non. Por suerte o disgracia, tolo qu’arrodia a la llingua y cultura asturianes ta politizao, lo mires per onde lo mires, y nun ye pola nuesa culpa; pero a mín lo del “tóu val” nun me presta nada.

Ta claro que non sólu facemos teatru n’asturianu, sedría imposible sobrevivir namái que d’ello; facemos munches otres coses, comu yá dixi enantes, tamién pa públicu en castellán.

Lo que mos define meyor como compañía pienso que ye la bayura d’espeutáculos d’estilos estremaos y pa diferentes públicos que tenemos fecho; de clásicos en castellán, (los Calderones o Iphigenia) a contemporániu (“Albentestate”), infantil, cai, adultos, italiana, Commedia dell’arte, asturianu… de tóu.

D’otra miente, ¿cuála ye, al so paecer, la situación anguañu del teatru n’Asturies y del teatru asturianu en particular?, ¿piensa que sigue ocupando a día de güei un gran espaciu na sociedá?, ¿cómo ve’l so futuru?
Enantes d’entamar, quiero dexar claro que esto son les miós opiniones personales; nun quixere que se confunda’l mio parecer col de la compañía onde trabayo, xunta compañeros y compañeres que nun tienen porqué pensar como yo. Insisto: soi yo l’únicu responsable de tolo que digo.

Parto de la bas de que’l Teatru ye una forma d’espresión cultural qu’al ser de dominiu públicu tien de tar tutelada y tien de ser sofitada poles instituciones que curien de lo público. D’equi vienen los conceutos de política cultural ya industria cultural; los gobiernos planteguen formes de política cultural sigún los sos idearios, y la industria cultural ye una industria privada que tien un fin públicu. Por exemplu, los centros dramáticos nacionales o autonómicos, onde los haiga, tan fechos col enfotu de curiar del patrimoniu teatral (clásicos, autores d’anguañu, ya eso) del so ámbetu territorial correspondiente; el gobiernu asturianu nun lo comprende asina, yá que nun sólo nun crea estes instituciones pa curiar del teatru asturianu con denominacion d’orixe, como sedría la so obligación, sinón qu’invierte una barbaridá de perres, onde nun les hai, en proyeutos como la Ciudá de la Cultura de la Llaboral, que nun tien ná que ver cola cultura nin el teatru nin el públicu nin la industria cultural asturianes, nin coles sos necesidaes. Esta realidá práutica tien una motivación na so política cultural, que ye, evidentemente, esaniciar tóu intentu de que la industria cultural d’Asturies espoxigue, y trata d’enxertar unos vezos culturales ayenos a lo nueso, pero nes nueses instalaciones y coles nueses perres. Nun digo que nun debiere esistir una ufierta d’esi tipu, pero si esistiere, debía depender en tóu casu del Ministeriu de Cultura español y non de la Conseyería de Cultura.

A l’afirmación de que’l gobiernu asturianu y más concretamente la Conseyería de Cultura, quier esaniciar tolo que suene a cultura asturiana, o teatru asturianu, namái qu’apurrir dellos datos: el primeru, que sigún datos de la Federación de Productores d’Audiovisual, n’Asturies perdiéronse más de mil emplegos esti añu, pola falta atención a les productores asturianes dende la TPA; el segundu, que la llingüa asturiana nun ye oficial nin lo sedrá nunca mientres sigan gobernando éstos, con tolo qu’eso representa de compromisu del gobiernu asturianu cola cultura del país; y un terceru: sigún la revista La ratonera, Mateo Feijóo cobra 176.000 € añales pola so xestión nel Teatru de la Llaboral, lo que yá me paez daqué antiéticu nos tiempos que cuerren; pero lo que me paez entá munchu pior ye que se destinen les mesmes perres pal circuitu de Teatru Profesional, 176.000 € (dos millones de les pesetes vieyes al mes), presupuestu y circuitu del que dependen cuarenta compañies profesionales y los/les sos trabayadores; allá onde se ve que ye un presupuestu miserable, enriba esti añu se vio reducíu a la metá, un 50% menos frente al 5% de los funcionarios. Ye la única forma de trabayar de les compañíes profesionales, y tán faciéndolo esapaecer, y con elli, a les compañíes como la nuesa, que vivimos honradamente del nuesu llabor; y tamién faen esapaecer puestos de trabayu de los que nun fala naide, porque nun somos el so modelu d’industria cultural, nin entramos endientru’l so conceutu de politica cultural afayaíza pa esti país de nueso, que non suyu.

La idega que tien la Conseyería sobro’l teatru y’l teatru profesional, ye que, talo que fai 50 años, los trabayadores salen del curro, les muyeres de la so casa y van facer teatru, o van cantar nun corín, pa canalizar enerxíes y tar contentinos pa dir a currar a Ensidesa o a la mina al día siguiente, o a facer les cames demientres canten “Cuatro pañolinos tengo”. Esta afirmación, en tono poco seriu, pero nun por ello menos braera, tá afitada nel fechu que la cadarma del Circuitu Profesional (venti ayuntamientos, que tienen d’ufiertar 10 funciones mínimu al añu son 200 funciones, pa 40 compañíes, da una media de cinco añales por compañía, una ca dos meses, cuando sedríen necesaries polo menos ocho al mes pa qu’un actor o actriz seya un mileurista cualaquiera) ye un heriede del antiguu Plan Asturies Cultural (un plan fechu pa “facer llegar la cultura a tol mundu”, oxetivu un pocu yá superáu güei en temes de política cultural) y, magar que camudara de nome, nun s’adautó al profesionalismu, nin al aumentu compañíes nin de trabayadores. La industria teatral y cultural asturiana ta condergada a que la traten, a que la vean, a que la valoren como daqué folclóricu. Amás, dende l’Alministración, sobrotóo les llocales, nun se caltién dengún compromisu de dengún tipu con esta industria, que ye responsabilidá de tóos. Asina vese como positiva y como daqué cosa normal la ufierta dafechamente deslleal que faen los grupos aficionaos de teatru, qu’arrevienten el mercáu baxando cachets, nun paguen seguridá social, esploten a los trabayadores… y qu’a dellos programadores permite-yos enllenar una programación con produtos baratos y mediocres na so mayoría. Eso, que ye’l frutu de la proverbial desatención y falta compromisu cola cultura y el teatru, nun debiera consentise de denguna forma. Esclariar que nun teo nada contra’l teatru amateur, paezme bien que se faigan coses, sinon de qué va alimentase’l teatru profesional. Nos mesmos tamién entamamos asina. Pero sí lo teo a la escontra d’un comportamientu deslleal y de la falta planificación. Sedría necesario redefinir cuálos son los fines d’una asociación cultural, pa que nun seyan empreses camuflaes. Eso, pémeque, tamién pasa con delles compañíes profesionales, que realmente nun lo son. Esto ye Asturies. N’otros llaos nun pasa.

Futuru nun-y veo. Tamos pagando una crisis que ta esñizando la poca cadarma que tiníemos, y xuraría qu’en pasando la famosa crisis ésta, naide va preocupase de recuperar el pocu nivel qu’había (la segunda autonomía per baxo n’inversión en teatru por habitante del Estáu), nin naide va ponese a llantar los pegoyos pa qu’esto espoxigue como tien de ser. Alcordémosnos de qu’Asturies ye un barriu de Madrí; eso ye lo qu’amuesa claramente la política cultural, por nomala de dalguna forma, que se supón qu’esiste, conclusión a la que llego depués de tóu esti pequeñu analís.

En cuantu al teatru n’asturianu, práuticamente lo mesmo. Vieyes fórmules. Nun se sofita, y cúntase coles asociaciones de teatru tradicional de siempres, que garanticen una bona entrada a los teatros. El compromisu de les compañíes profesionales cola cultura y la llingua nun va más allá, en xeneral, de facer trés o cuatro funciones más tornando dalguna obra del castellán, y más allá del consabíu cálter folclóricu, nun hai dengún criteriu nin propuesta que valga sobro lo que foi, ye y tien de ser el Teatru Asturianu con denominación d’orixe per parte de grupos, compañíes, actores, escueles de teatru, programadores, conceyales, conseyeros nin gobernantes en xeneral. Al rodiu d’esto sólu conozo dalguna propuesta mía, y tamién delles de Dolfo Camilo.

Nel so casu, ta acabante de terminar la carrera d’Arte Dramáticu na especialidá de Direición Escénica pola Escuela Superior d’Arte Dramáticu d’Asturies (ESAD-Asturies). ¿Tres cuatro años, cómo evalúa al so criteriu la reglamentación de los estudios y la situación del teatru académicamente?, ¿Y de la institución académica que-y representa en particular?
Yá dixi que tantu Inma como yo fuimos alumnos del primer ITAE. Yá nun falamos de cuatru años atras, sinón de venticuatru. L’ITAE xurde de la demanda de los grupos de teatru d’aquella, (nun había coleutivos profesionales) pa qu’hubiera una institución o un departamentu que xestionara tóu lo venceyao al teatru n’Asturies. Falo del ‘86. Creose entós l’ITAE, y al partir d’elli, la Escuela; anunciárase d’aquella que diba ser la “Escuela Superior d’Arte Dramáticu del Norte”, y engañósenos diciendo que lóxicamente diben a ser estudios universitarios superiores. Tovía tamos esperando. Lo cierto ye que de la formación recibida, amén de que con unos mayestros pues llevate meyor que con otros, nun podemos quexanos demasiao, pémeque tuvo bastante bien, polo menos nos años que mos tocó a nós. El programa d’estudios taba aprobáu pol gobiernu asturianu; ye la primer contradición qu’atopamos cuandu dempués nun quieren reconocemos los estudios o cuando sentimos va pocu al Sr. Masegoso, direutor de la escuela Murcia y asesor del Ministeriu, dicir qu’aquello del ITAE yera como l’academia peluquería de Pepita. Plasmamos. De toles formes, anque incompletu, siempres pue pidise más, el plan d’estudios tinía la so lóxica, y había un bon nivel d’enseñanza.

De los años intermedios yá nun puedo falate tanto, nun tuvi contautu malapenes cola institución. Sé que camudó’l plan d’estudios de forma poco ortodoxa, y entró la LOGSE; que camudaron de sede al INTRA, y qu’entraron munchos profesores de fuera d’Asturies. Al pocu tiempu abriose la especialidá de direición escénica. Agora, depués d’estos cuatru años de direición, pueo dicir que nun me paez malu’l plan d’estudios, (seique hebio y hai dellos profesores perimplicaos, qu’intentaron facer unes programaciones afayaices, anque depués nun tuveiron l’algame que debieren tener) anque hai coses meyorables, por exemplu, el tratu pa los talleres fin de carrera, o les collaboraciones ente les dos especialidaes, interpretación y direición, una especie de tabú; otra cosa ye el nivel d’enseñanza, eché munches coses de menos; anque supongo qu’eso pasará’n toles facultaes. Y otra la escesiva burocratización del centru en cuanto a emplegu de los medios téunicos ya instalaciones, qu’impide muches vegaes un desendolcu normal de les coses.

Ye fuerte: a veces pienses (como cliente de la institución), y yo penselo munches y sigo pensándolo, qu’en realidá nun-y importa a naide que teas allá echando tiempu, y que cuantos más problemes tengas pa tóo, meyor. Nun sé, igual toi escediéndome, anque creo que dalgo d’eso hai. Hai daqué cosa perehí flotando que nun dexa qu’aquello furrule. Yo creo que falta un proyeutu de lo que debiere ser una escuela d’arte dramático venceyada cola so tierra y la profesión; y ye evidente la falta d’implicación del profesoráu nesi sen, falando’n xeneral.

Y nun ye por poneme pesáu, pero sí qu’eché de menos nuna universidá, nuna facultá asturiana, dalgo d’investigación, o datos, o trabayu, so’l nuesu teatru, la so hestoria, los sos autores, les sos formes, los sos clásicos… y n’Interpretación, les sos téuniques, la dicción… Enfádome munchu cuando un actor o actriz nun sabe pronunciar la “x”, por nun falar de la “l.l” vaqueira. Hai braeros problemes nes compañíes con esi tema, dígolo por esperiencia.

Y de la ESAD, aparte de lo académico, eché de menos tamién que fuere un centru de referencia de la profesión asturiana en global; cursinos, presentaciones, conferencies, estrenos… Agora ye una especie de burbuxa autofáxica; nun ye la escuela, nun ye la institución que la profesión necesita que seya.

Siguiendo col ámbitu académicu, la ESAD ve la lluz nel añu 2002, dando relevu al fasta entós Institutu del Teatru y de les Artes Esceniques (ITAE) debio a la demanda social d’una enseñanza teatral reglada. Sicasí, va un añu anunciaron “por razones económiques” dende la Conseyería d’Educación el desaniciu de la especialidá de Direición d’Escena na Escuela Superior d’Arte Dramáticu (ESAD) cola introducción, “a cambiu”, de Danza na mesma, pasando a nomase oficialmente “Escuela Superior d’Arte Dramáticu y Profesional de Danza”. En consecuencia, esti cursu 2009/10 yá nun convocaron dende la mentada Conseyería nueves places pal primer cursu de Direición. ¿Qué opina de tóu esto y a qué cree que se debe realmente esta “reforma”?
Namái dicir qu’una especialidá universitaria de direición escénica tinía de ser la perlla, la flor, la neña mimada del complexu Llaboral, ye la que tinía de provocar eses sinerxes de les que tantu mos falen, ye lo qu’estrema, o estremaba, esta escuela d’otres; ficiéron-y muncha propaganda cuando entamó, “les meyores instalaciones de tol Estáu”, etc. y nin dende la Conseyería, nin dende la mesma Escuela sepio dáse-y’l valir que tien, nin aprovechar la so imaxe p’atropar xente interesao en cursar los estudios, qu’hai muncha, nin pa proyeutala fuera tampoco.

Por cuenta d’absurdos criterios cuantitativos (debi ser una especialidá carísima de caltener yá que tien práuticamente’l mesmu profesoráu d’interpretación, y falar d’esto al lláu del Teatru de la Llaboral da la risa), la profesión asturiana vuelve a perder otra oportunidá. Nésti casu, de formase o reciclase, pa facer espoxigar la so industria. Nun s’entiende qu’equí seya problemático qu’haiga pocos alumnos (nós nel nuesu cursu acabemos cuatru y yá tiníemos problemes d’espaciu con tolo grande que ye aquello), y en Madrí o Copennhague non, cuando se mueven con ratios paicíos d’alumnáu. Ta claro que nun pue haber más direutores d’escena qu’actores o actrices.

Lo d’enxertar, o meyor, lo d’espetar danza na ESAD, pienso, ye una chapuza que creo qu’entá ta por ver si ye llegal o non, suponse que nun se puen amestar estudios superiores colos de gráu mediu; y los estudios de danza de gráu mediu, lo normal ye que s’asitiaren nel conservatoriu música, como’n cualaquier sitiu civilizáu. O notru sitiu independiente, que la Llaboral ye pergrande.

¿Les razones poles que se fai esto? Nun sé. Dalgún habrá que quiera ganar méritos, o que-y tea zuna a los “teatreros”, entá nun soi a entendelo. Testeronaes, ocurrencies, desconocimientu, o quiciabes intereses de dalgún tipu. Otra oportunidá perdía; pero ehí, anque tien bona parte de culpa, la mayor parte, pémeque nun sólo ye l’Alministración; la especialidá de direición nun-yos interesa más qu’a los alumnos que s’apunten, que son los que realmente la perfaen. Nun interesa a los alumnos d’interpretación, tán nel so mundu; tampocu a bona parte del claustru profesores de la Escuela, ye mui complicao xestionar esa especialidá, y voi dexalo ehí; nun interesa a los equipos direutivos de la ESAD, porque defendela ye sinificase énte l’Alministración; nun interesa a dellos grupos profesionales, porque asina hai menos competencia; nun interesa a la profesión en xeneral porque tola vida anduvimos enllamorgaos n’aquiescencia, nel amateurismu y na curtiedá de mires; nun interesa porque nunca se miró pol futuru de la profesión a llargu plazu; nun interesa porque vivimos nún pueblu d’inxenieros onde manda’l “tóu val” y onde’l más tontu fai relós… A la fin, otra maniobra de l’Alministración pa esaniciar el Teatru y la industria cultural llariega, ya imponer el so modelu.

¿Qué opinión tien de la política cultural (y específicamente nel ambitu de les artes escéniques) de les instituciones, y qué papel xueguen nella los profesionales del Teatru?, ¿cree que soestímase a la profesión y qu’entá hai un llargu camín pa normalizar y dignificar socialmente esti arte o pol contrariu yá tán los oxetivos cumplíos a esti respeutu?
La política cultural ye aquello que los gobernantes faen cola cultura sigún los sos criterios políticos, p’algamar un resultáu u otru; pa eso depués establécense aiciones de política cultural, en cierta forma pa “manipular” la cultura. Ye lo que tienen de facer, otra cosa ye que lo fagan meyor o peor. Asina yá l’illustráu Xove y Llanos, el primeru (y non sé si l’ultimu, o ún de los últimos) que n’esti estáu plantegó un debate sobre política cultural, teamos d’alcuerdu o non colos sos plantegamientos, taba enfotáu’n qu’el teatru tuviere una finalidá educativa, por exemplu. Anguañu, los criterios que se deriven de les directrices de la UNESCO van empobinaos a la llibertá creadora del artista, y a la democratización de la cultura. Esto de la democratización de la cultura equí n’Asturies, la Conseyería entiéndelo como averar la manifestación artística a tol mundu (díxolo va pocu la Conseyera). Por eso se fizo, cola democracia, una rede de biblioteques y cases de cultura por munchos conceyos d’Asturies, (que curiosamente’n casi dengún casu podía facese teatru nelles, digo teatru’n condiciones, sí pequeñes manifestaciones. Agora felizmente recupérense dalgunos teatros polos conceyos, y piérdense otros, por exemplu, l’Arango, ante l’aquiescencia xeneral). Ye cierto qu’Asturies tien graves problemes de comunicación pola mor del so poblamientu, y de les comunicaciones, etc. pero pamidea qu’esta lletura de lo que ye la democratización de la cultura yá tá abondo superada a estes altures. Por dos razones.

Una razón ye porque la cultura, d’una manera u otra, yá llega a quien la quiera. Hai instalaciones, polo menos dalgunes dignes, y hai otros instrumentos munchu más potentes, como la TV o Internet, que s’encarguen de dinamizar la cultura, falo cultura’n xeneral. La política cultural n’Asturies nun se reconvirtió al tiempu que les compañíes fueron dexando de ser amateurs pa convertise’n profesionales. Nun hai dengún plan empobinao a les compañíes de teatru profesional. El Circuitu esistente ye lo mesmo qu’el plan Asturies cultural, un plan pa los conceyos, que vien de cuando nun esistía la profesionalidá, y que yera un sacu onde podía entrar lo mesmo un monologuista, un grupu baille o un cuartetu de cuerda “p’averar la cultura a tol mundu”.

Otra razón ye que la braera democratización de la cultura, y más en tiempos de crisis, l’alministración (que lo único que ye capaz de facer pa qu’el seutor nun se resienta de la crisis ye recortar un 50% les ayudes miserables, nun contratar funciones, y allá vos va que vos preste, y polo tanto, nun aporta soluciones, nun furrula, fracasa) nun ye permeable a trabayar en comuña colos axentes dinamizadores, que son en principiu les compañíes, los colectivos d’artistes o bien los trabayadores (como directores d’escena titulaos, nun ye por ná), pa que fagan les sos propuestes en cuantu a política cultural, acciones culturales, iniciatives, y muevan esto pa dalgún lláu. Sólo val el so criteriu, son un poco los nuevos illustraos, tóo pal pueblu pero ensin el pueblu. Llaboral ye la triste evidencia.

Per otru lláu les alministraciones llocales tamién dexen abondo que deseyar; dalguna, concretamente Xixón, que fai un importante esfuerciu n’ayudes pa toa mena d’asociaciones, nun estipula tampocu denguna diferencia de tratu clara ente les compañíes profesionales y les asociaciones culturales, nin falando de les perres destinaes p’ayudes a la produción nin en contrataciones; más bien tolo contrario, tiéndese a lo amateur y a lo baratino.

Claru qu’hai munchu camín por esbrexar; pero yo toi convencíu de que nun lo va iguar naide; namai que podemos facelo los d’abaxo, y na midía que mos dexen. Nun ye fácil entender pa ellos qu’un direutor de teatru ye tan importante como ún de música clásica, por exemplu, o un actor o actriz tan importante como un trabayador cualaquiera. Y que les artes escéniques ye una industria tan importante como la siderurxa, anque haiga menos trabayadores.

Pero ehí tamién hai que llamar l’atención a los coleutivos del gremiu (sindicatu d’actores, asociaciones de compañíes…). Dígolo con tol ciñu y respetu del que soi capaz. Falamos con criteriu. Inma y yo fuimos fundadores de la Unión d’Actores d’Asturies, allá pel 92, y nel mió casu, tuvi once años de secretariu xeneral. Ta demasiado parao, pal mió gustu. Pamidea, y amás, colos tiempos que cuerren , la organización debiere ser más dinámica; tener muncha más presencia nos medios de comunicación y tar más implicada cola realidá de les industries culturales – teatrales, y coles sos organizaciones, pa facer presión en comuña a la fin d’algamar un sitiu afayaizu onde poder trabayar; nun limitase a facer cuatru cursinos de reciclaxe. Ehí yo creo que tamién esiste ciertu “acortuplacismu”; el mundu sindical de los actores y actrices termina na rellación coles compañíes, y eso nun ye asina; yo pienso qu’el sindicatu tien de tener otros fines de cálter más global, por exemplu, y venceyándolo con Asturies, ye necesaria una industria de doblaxe al asturianu, son necesaries producciones n’audiovisual, ye necesariu un plan de teatru, etc. y el sindicatu tenía de tar ehí. Bono, agora tienen eleiciones, a ver…

Al respeutu de les asociaciones de compañíes, dos, una tá acabante crease y tá por ver no que para; la otra que tien más años, pémeque ye tamién un pocu tibia, y qu’a veces confúndense los intereses globales colos de les compañíes en particular. Nun sé tuvimos contautu con ellos, pero fai yá tiempu; ye una sensación. Magar que ta claro que d’una forma u otra, nagua por dinificar la profesión, intenta negociar cola alministación sobre temes concretos de polítiques y aiciones culturales…

Xeneralmente concíbese’l Teatru como un arte, ¿pero cuála ye la so conceición personal?, ¿ye tamién una ciencia y en consecuencia piensa que deberíen de reglamentase al traviés de la creación de “Teatroloxía” unos estudios universitarios pal Teatru? D’otra miente, ¿contempla como daqué relevante’l llabor social del Teatru o primen más otres cuestiones?
Pa mín el teatru ye una forma de vida, qu’implica una toma de posición del artista frente a la realidá; qué menos que tener ciertu espíritu críticu, y naguar por meyorar esti mundu, por facelu un poco más xustu, y por facer la esistencia meyor a les persones. Eso ta abondo lloñe de la visión individualista y vanidosa, d’imaxe vanal, d’artisteo barato, de gueta de perres fáciles, que ye lo que pienso que prima nestos tiempos de capitalismu xabaz. Nesi sen de lo social nel teatru préstame munchu la visión que tuvo Augusto Boal, por exemplu.

Nun toi demasiao puestu nel tema de programaciones d’estudios universitarios, pero ye lóxico pensar que si al respeutu del arte de la Música hai estudios científicos de Musicoloxía, al respeutu del arte del Teatru bien podría haber estudios de Teatraloxía, como plantegues. De toes formes hai diferencies; mientres naide dulda qu’un músicu tien de tener conocimientos musicales pa exercer de músicu, pos muncha xente piensa que teatru failo cualquiera y equí actúa o dirixe hasta’l más pintáu. Entós pienso qu’un primer pasu ye algamar esa dinidá nel nuesu entornu más inmediatu; desterrar la chapuza. Pa entamar, que tean bien reglamentaos, y que seyan respetaos los estudios d’Arte dramático, que reconozan los titulos de la xente que lo estudió, que nun quiten por caprichu especialidaes necesaries de la ufierta d’estudios universitarios, como Direción d’escena, o que cuandu convoquen places pa mayestros de Bachillertau artísticu, comu ficieron apocayá los de la Conseyería d’educación asturiana, nun convoquen a filólogos pa dar espresión dramático, o a biólogos pa dar danza, y que dexen presentase a los titulaos n’Arte Dramático, que ye a quienes-yos correspuende impartir eses materies.

En cuantique a la rellevancia no social que pue tener el teatro güei, dizse perehí que si esapaez el teatru nun pasa nada, , de xuru que si se prohíbe’l fútbol, entós entamábase una curiosa. Ye verdá, del teatru, y por estensión, de la cultura, namái que vive’l profesional que lo fai, nun ye daqué imprescindible pa la esistencia humana (el fútbol tampocu). Pero si s’esaniciare’l teatru, el poder diba llibrase d’un bon enemigu; porque’l poder (nel que s’inclúi’l poder asturianu) nun ye amigu de que les persones tengamos conciencia de lo que somos pola mor de la nuesa memoria como persones y sociedá; al poder nun-y presta ná que s’empleguen los escenarios, esi sitiu tan interesante de proyeición y poder que tantu nagüen por invadir (talo que nos teatros romanos o nos del Barrocu, cuandu se poníen allá alantrones tamién pa ser vistos por tol mundu, mesmamente como fai Gabino de Lorenzo col so palcu nel Campoamor); a los del poder nun-yos presta la sonadía que tien lo que dicen los artistes, que suelen ser amás xente más o menos culto; al los del poder nun-yos presta nada que se tresmita la cultura direutamente al pueblu, ensin manipulala, porque asína ye más complicao imponer el so criteriu; a los del poder nun-yos presta que-yos amuesen a les clares que les coses pueden facese munchu meyor de lo que lo se faen; a los del poder nun-yos presta que la xente se ría de los que los oprimen, quieren que-yos tengan llercia. Los del poder nun quieren que la xente seya feliz, nun quieren que la xente se ria, o que llore, nun quieren que la xente s’esprese, quieren que la xente tea muerta’n vida endientru d’esta sociedá paternalista, na que tolo que quieras facer ye malo o ta prohibío; nagüen por camudanos a toos en seres inertes, moribundos, asociales, descerebraos, manipulables. A los del poder nun-yos presta que sepamos que toos somos iguales, porque ellos siéntense superiores. El Teatru ye humanu, ye incómodu, ye rebelde, ye peligrosu. El Teatru trata de les persones, de la sociedá, de la xusticia, del alma. El teatru igualaría la estaya de los humanos a la de los dioses, si esistieren. Fainos trascender, meyorar. Por eso quieren esaniciar el teatru, y non el fútbol.

Espaciu llibre.
La crisis ye un momentu perfavortible pa inventar otres coses. Equí n’Asturies, como nun tenemos un res, tenemos la suerte de que ta tóu por facer, pero nun podemos dexanos vencer pola pantasma de la crisis. El Teatru, el Teatru Profesional Asturianu, tien d’atopase a sigo mesmu, la so función y nel so sitiu. Pero tenemos de ponemos a ello; la xente que tea interesao, xunise, proponer, trabayar. Acabar cola chapuza, l’aquiescencia. Llantar los pegoyos de les cadarmes que necesitamos, iguar los nuesos preseos. Ye forciosu que nesi sen, el de construyir, teamos solos, dependamos de nós mesmos. Ye duru; los del poder nun mos van aidar. Nin quieren, nin puen, nin saben. Pero nun hai de dá-yos tiempu a reaicionar.

Nun ye namái que retórica; muncho depende de la voluntá que-y pongas y les ganes y el tiempu que teas. L’entamu d’ún Centru Dramáticu pue vinir de mano d’una fundación privada. Puen abrise espacios p’actuar si llogramos asitiar compañíes estables nos espacios de los que disponemos; podría haber una empresa que xestionase un circuitu pa los ayuntamientos, o pa les escueles, que nun esiste; puen facese coproducciones, colo público y lo privao; que l’asturianu nun ye oficial, pues escribi testos, o entama un festival…; si quiten especialidaes, organices tú un plan formativu p’artes escéniques… Soi mui amigu y defensor de lo público, pero si te nieguen el pan y la sal, habrá qu’averase a la iniciativa privao.

Bonu, valió. Esto de suañar un pocu ye mui guapu; teo dicir na mió defensa que lo que dixi enantes sedrá lo que piensa más o menos tol mundu; otra cosa ye la capacidá d’acomode y l’indiz de rebeldía, o de “odiu atávicu”, que tenemos caún. Na midía que pautes col poder tendrás el to premiu, y yo tamien selo y dígolo nesta entrevista, que ye de calter personal, que nun soi tontu, que tamién tengo preciu, como tóos; home, va.

Acabo citando a Augusto Boal: “Tóo’l teatru ye un actu políticu. Toles actividades del ser humanu lo son, y el Teatru ye una d’elles. El Teatru ye un arma”.

(d’Aruelu.com, 11-07-2010)