Entréguense na Feria de Muestres los «Urogallos de bronce»

Esta tarde, el Centru Asturianu de Madrid entrega los premios que concede de forma añal pa reconocer el llabor de persones o instituciones relacionaes con Asturies, n’especial los que puxen pola cultura tradicional. Los gallardones, con forma de gallu xabaz, son los cuerrespondientes al añu pasáu. L’actu va a ser a les 19 hores nel auditoriu de la Feria de Muestres d’Asturies, que ta celebrándose en Xixón. Y va a tar presidíu pol presidente Centro Asturiano de Madrid, Cosme Sordo, y l’alcaldesa de Xixón, Paz Fernández Felgueroso. La primera distinción «Entidá Asturiana del añu 2009» va a entregase a l’axencia de publicidá Impact-5, que fizo varies campañes institucionales y acaben de reeditar la guía Comer entre Asturianos que rcueye restaurantes asturianos asitiaos en Madrid.

L’Urogallo de bronce d’artesanía ye pal Taller Laborna, de Valbona (Siero), que se dedica a la cerámica. El de baille, tóca-y a l’Asociación de Baille y Danza Tradicional Filandón, con sede n’Uviéu. Na estaya de tonada, los premios van pa Laudelina Hortal González, el femenín y p’Aquilino Fernández González, el masculín. L’Urogallo de corales va a dase al Ochote Asturias, d’Avilés, que fai poco dieron un conciertu en Cambridge (Reinu Uníu). El de gaita compártenlo Andrea Fernández Joglar –qu’acaba ganar el MacCrimmon en Lorient– y Hugo Noval, tamién gaiteru habitual de los concursos.

El de gastronomía ye pal restaurante El Llagarón, del conceyu de Belmonte. El personaxe distinguíu esti añu ye Jesús Pedro Suárez, conocíu como Chus Pedro, el cantante de Nuberu. El gallardón de llingua asturiana ye pa la escritora María Luz Pontón Álvarez y José Sariego, director del Muséu de la Llechería de Morcín. Na defensa de la naturaleza distinguen a Luis María Arce Velasco. Nel apartáu de festexos, destaquen el Día de los Pueblos d’Asturies que se celebra en Navelgas (Tinéu). Y en deporte, ye l’individual pa Bernardo Menéndez, xugador reconocíu de cuatreada; y el colectivu pal equipu femenín Biesca Gijón Hockey Club, campeones d’Europa en 2007, 2009 y 2009, asina como de la Lliga OK 2009. Amás, el Centru Asturianu concede los siguientes premios especiales al Muséu de La Romería n’El Carbayu (Llugones); la Fundación Musical Don Pelayo (Uviéu); Embutidos Vallina (Avilés); Xuacu López Álvarez, director del Muséu del Pueblu d’Asturies; el folklorólogu Fernando Ruiz Fernández.

(de la Estaya d’Asturianu de la RTPA, 10-08-2010)