L’alcuentru lliterariu Arribada 2010 va principiar el sábadu 18 nel Puertu Deportivu de Xixón cola arribada d’escritores y el pasucáis cola Banda de Gaites Corvera d’Asturies. A lo llargo d’una selmana, Xixón va acoyer presentaciones de llibros, tertulies, conferencies y la estrena de la primer película doblada al asturianu: La nueche de los muertos vivientes.
El mesmu sábadu 18, nel Centru de Cultura Antiguu Institutu principien les actividaes cola proyección del documental A bruxa de Brañavara y un homenaxe a la poesía asturiana. Un día depués, a les 12 de la mañana, nel Hotel Arena va haber un almuerzu lliterariu. Mentes, el llunes 20 les actividaes pasen al Centru Municipal de L’Arena y van tar centraes nel patrimoniu asturianu, l’arqueoloxía y l’antropoloxía, con una tertulia sobre los 25 años de l’asociación Belenos o una conferencia sobre la Edá del Fierro nel Cantábricu de Jesús F. Torres Martínez, del departamentu de Prehistoria de la Universidá Complutense de Madrid.
El martes 31 va tar centráu na lliteratura xuvenil, con una tertulia sobre’l tema y la presentación de les últimes novedaes del xéneru. Al otru día, van presentase les publicaciones del 2010 de l’Academia de la Llingua Asturiana y d’otros llibros como Tu como yo. El nacionalismu vistu d’otra manera, d’Inaciu Iglesias.
Yá de miércoles, l’actu más importante de la xornada ye la entrega del Premiu Timón al escritor llionés Roberto González-Quevedo, mentes qu’un día depués va facese un homenaxe a l’actriz Aurora Sánchez, a la que va siguir la representación de La trastá, d’Arsenio González, de la Compañía Asturiana de Comedies.
El sábadu 25, l’Arribada vuelve al Antiguu Institutu pa pesllar con una tertulia sobre muertos vivientes na lliteratura y el so treslláu al cine, amás de la proyección de La nueche de los muertos vivientes, primer película que tien una versión doblada n’asturianu.
ANEXU: Programa completu de l’Arribada.
(de Les Noticies, 14-09-2010)
Tierra alantre, la mesma fala 
Deixar ua Respuosta