El pallabreru de la natación ye la segunda de les publicaciones dedicaes al mundo del deporte qu’edita la Oficina Municipal de la Llingua del Conceyu de Xixón. El palabreru publícase cola finalidá de crear y difundir material específicu del mundu del deporte, al tiempu que se fai un llabor de sensibilización y normalización del usu del asturianu tanto dende los clubes o entidaes deportives como dende tolos departamentos y conceyalíes de Xixón.
«Tamién ye importante que les asociaciones y entidaes deportives se decaten del so importante papel na promoción del asturianu y favorecer l’accesu de la ciudadanía a productos y servicios deportivos na nuestra llingua», indiquen dende la Oficina de la Llingua de Xixón.
Les autores, Cristina Bobes Limenes, Teresa Rodríguez Fernández y Maria Xosé Rodríguez López, recueyen nesti llibrin más d’un cientu términos que falen del palabreru en xeneral colos movimientos de brazos y cuerpu, de les acciones que se faen nuna piscina, de les maneres de tirase, de los oxetos y la ropa que s’usa pa bañase y de la piscina en particular.
Tamién, ente braciada y braciada, fala de la natación pura, colos distintos estilos, la natación n’agua abierto, la natación sincronizada, los saltos y el waterpolu. Pa rematar, unes pingarates d’agua recueyen los fechos y les persones que más rescamplaron nel mundu de la natación.El pallabreru de la natación –del que s’editaron 2.000 exemplares– va repartise ente los usuarios y usuaries de les piscines xixoneses al traviés del Patronatu Deportivu Municipal y ente tola xente interesao al traviés de la Oficina Municipal de la Llingua.
(de Les Noticies, 17-09-2010)
Tierra alantre, la mesma fala 
Deixar ua Respuosta