Otra manera de facer historia

ANTÓN GARCÍA

Nel añu 2007 aparecía’l primer númberu de la revista «Erada», que llega agora al terceru. Esta revista, dedicada a la Historia Contemporánea d’Asturies, ye un proxectu personal de Rafael Rodríguez Valdés, el so director, lo que-y permite publicar los dos primeros númberos con Trabe y cambiar pa esti terceru de casa editorial, sacándolu Suburbia. Nel aspectu formal el cambiu ye notable. Abandónase la llinia clásica de los primeros númberos pa estrenar un diseñu setentista, con tipos de palu secu y negrina nos títulos. Dalgunos detalles, como les notes que cain fuera de la caxa en munches páxines, la partición de palabres a la inglesa (p. 119) o una tipografía grande y espaciada, dan-y a esti númberu un ciertu aire d’autoedición.

La distribución de conteníos xira alredor de varios apartaos: artículos, notes y reseñes; nesti tercer númberu hai tamién una addenda que corrixe una imprecisión publicada nun artículu del númberu dos. Nel primer apartáu, l’historiador Faustino Zapico repasa «La campaña autonomista de 1897», un averamientu a les propuestes rexonalistes de los republicanos federales d’Asturies, que’l llamáu desastre de 1898 (la perda de la guerra contra USA y con ello Cuba y Filipines) diba aplazar dos décades. Cristóbal Ruitiña, periodista y historiador, publica «La reaparición d’Asturies nos entamos d’opinión pública democrática nel tardofranquismu. La salida d’Asturias Semanal (1969)». El tamién historiador Armando Magadán analiza los pasos que llevan a la formación del Partíu Asturianista a mediaos de los ochenta y la so evolución nel artículu «El Partíu Asturianista (PAS) (asturianismu y interclasismu como estratexa)». Resulta curioso repasar nesti trabayu la olvidada, inútil y tendenciosa polémica sobre l’usu del asturianu por Sánchez Vicente na Xunta Xeneral en 1991, y los informes de l’Academia de la Llingua y de la Universidá sobre la calidá de la expresión del diputáu asturianista.

Patrick W. Zimmerman, historiador americanu, dedica’l so trabayu a les «Reflexones sobre nacionalismu y historia viva: Nota d’un proyectu sobre la historia d’un nacionalismu frustráu», un avance de lo que va ser la so tesis doctoral sobre l’asturianismu, na que trabaya actualmente na Carnegie Mellon University .

Nel prólogu del primer númberu, Rodríguez Valdés dexaba clares les intenciones de la revista: que nella se pudieren «conocer trabayos d’investigación que nun perpasen nin les llendes de la Universidá nin les páxines de revistes hermétiques, mesmo que francer el monopoliu historiográficu que caltienen delles persones». A esa idea sigue respondiendo’l tercer númberu d’Erada, una revista con voz propia a la qu’igual-y convenía crecer en conteníos anque fuera renunciando a la hexemonía del asturianu.

(de La Nueva España, 16-09-2010)