La Oficina Municipal de la Llingua del Conceyu de Xixón ta acabante editar l’axenda escolar pal presente cursu 2010-2011. Ésta tien unes característiques especiales adaptaes a la so finalidá, como por exemplu principiar en setiembre y acabar nel mes de xunu (periodu escolar), o secciones dedicaes al horariu escolar, al calandariu d’exámenes, a les feches importantes o a les salíes estraescolares.
L’Axenda dedícase cada añu (hasta agora lleven editaes ocho) a un tema determináu. Asina, si n’ocasiones anteriores yeren los díes internacionales, les llingües del mundu, la ecoloxía o l’astronomía, nesti cursu’l tema central ye la bioloxía, con estayes que falen del xabaril, l’osu, la zooloxía, la biodiversidá nos espacios protexíos, la ornitoloxía o l’ocle (ente otres munches cuestiones).
L’oxetivu d’esta publicación ye promover l’usu y conocimientu de la llingua asturiana ente l’alumnáu de secundaria y bachilleratu, al tiempu que-yos faciliten a los estudiantes recursos pa una meyor organización y distribución del tiempu escolar. L’axenda va repartise ente tol profesoráu d’asturianu del conceyu de Xixón y los cuasi 700 alumnos y alumnes matriculaos en llingua asturiana en Secundaria y Bachilleratu nos centros escolares del so territoriu.
(de la Estaya d’Asturianu de la RTPA, 20-09-2010)
Tierra alantre, la mesma fala 
Deixar ua Respuosta