Na reunión del miércoles 24 de payares, el Conseyu de Gobiernu aprobó’l decretu pol que se determinen los topónimos tradicionales del conceyu d’Avilés, el tercer conceyu asturianu no tocante a númberu d’habitantes. Cola so aprobación, son yá cuarenta y ocho los conceyos asturianos que van tener los sos topónimos tradicionales oficializaos, ventiséis d’ellos nesta llexislatura. El procesu de revisión toponímica ye necesariamente llargu y exhaustivu. Entámase a pitición de los propios ayuntamientos, y cuenta cola participación abierta de los partíos políticos con representación municipal, los colectivos de vecinos, les asociaciones de la zona, l’Academia de la Llingua Asturiana, el Real Instituto de Estudios Asturianos y la Universidá d’Uviéu, mesmo qu’investigadores, encuestadores y espertos en toponimia. Toos ellos collaboren nun procesu sistemáticu y rigurosu, trabayando, debatiendo y revisando les formes toponímiques hasta alcanzar alcuerdos y soluciones de consensu. A les resultes d’esti trabayu conxuntu, son casique 15.000 los topónimos tradicionales recuperaos desque en mayu del 2005 se publicaren nel Boletín Oficial del Principado de Asturias los primeros decretos d’oficialización toponímica. Na actualidá, otros 15 conceyos más tienen abiertu’l so espediente, alcontrándose en distintes fases de tramitación.
(de la Dirección Xeneral de Política Llingüística, 25-11-2010)
Deixar ua Respuosta