La Xunta pola Defensa de la Llingua Asturiana (XDLA) acaba de mostrar el so apoyu a les decisiones tomaes pola Xunta de Toponimia y píde-y que nun ceda a les «manipulaciones» que, según l’asociación, tienen el fin de valtar el procesu técnicu, científicu y democráticu pol que s’afita la toponimia tradicional d’Asturies.
Pa la Xunta, estes manipulaciones vienen d’un mediu de comunicación y de les práctiques que «caciques locales» lleven alantre nestos meses en dos parroquies del conceyu Carreño.
Según la XDLA, trátase de «maniobres delirantes y trapaceres de la prensa marellista y l’actuación de grupos escurantistes, nostálxicos y ultras que traten d’echar per tierra un procesu de recuperación toponímica xustu, adaptáu a la llegalidá y exemplu de participación democrática y procuru».
Pa la Xunta, una sociedá que se diz civilizada nun pue permitise que los argumentos «viciaos, sesgaos y acientíficos» salgan trunfantes. Amás, señalen que la «presión mediática» nun pue alteriar los criterios de rigor colos que se determinen los topónimos tradicionales.
Por eso, piden a les instituciones competentes y a la Xunta de Toponimia firmeza y rigor nel cumplimientu de les sos atribuciones llegales y democrátiques.
(de Les Noticies, 24-11-2010)
Tierra alantre, la mesma fala 
Deixar ua Respuosta