El próximu día 27 de payares van desarrollase na ciudá bretona d’An Oriant/Lorient dos acontecimientos importantes dientro del calendariu añal européu rellacionáu coles llingües minoritaries: el congresu añal Partnership for Diversity y el Festival Liet International. Previamente, el día 26 va facese una reunión de socios de la Fundación Liet. Toos estos eventos van contar con presencia asturiana.
Festival Liet Internacional 2010 de canción en llingües rexonales o minoritaries (sábadu 27, 20.30 hores, en directo nel segundu canal de TPA)
El grupu asturianu Xera representa a Asturies nel Festival Européu Liet de la canción col tema “Tierra”, canción ganadora del Premiu al Meyor Cantar 2010, entamáu pola Conseyería de Cultura y Turismu y celebráu en Mieres del Camín el pasáu día 20 de febreru del 2010. El Festival Liet, que nesta edición se celebra na ciudá francesa d’An Oriant/Lorient, a les 20,30 hores del sábadu 27, va retresmitise en directo pola TPA (segundu canal). Participen 11 finalistes de distintos países y comunidaes llingüístiques europees, que van defender la so candidatura na Sala Cosmao Dumanoir, d’An Oriant/Lorient. El representante asturianu nel xuráu del “Liet International” ye Aurelio Argel, reconocíu especialista musical con una amplia trayectoria como periodista. El Festival Liet International nació nel añu 2002 como heriede d’un veteranu festival de canción frisona —llingua falada nes zones fronterices ente los Países Baxos y Alemaña— que recibía’l nome de “Liet Ynternasjionaal”. Dada la repercusión importante y l’interés mediáticu que dichu festival alcanzara, pensóse n’ampliar el so radio d’acción al envís de mostrar y apoyar la gran diversidá llingüística esistente nel continente européu, y difundir les distintes propuestes musicales qu’usen estos idiomes. D’esta manera, el Liet dio en ser a lo llargo d’estos años una “eurovisión” de les llingües minoritaries europees, contando col apoyu, ente más otros, del Conseyu d’Europa. La cooperación del Gobiernu del Principáu d’Asturies cola Fundación Liet comenzó l’añu 2008, la primer vez qu’a un grupu asturianu –Dixebra- seleccionárenlu pa participar. Dicha cooperación afianzóse dende esa fecha y zarróse un acuerdu de collaboración ente la Conseyería de Cultura y Turismu, al traviés de la Dirección Xeneral de Política Llingüística, y la Fundación Liet International, con sede nos Países Baxos. En virtú d’esti acuerdu la Fundación Liet, que cuenta col apoyu del Conseyu d’Europa, considera Asturies como sociu estratéxicu del Festival Européu. Demientres estos tres años, el Gobiernu asturianu va siguir organizando’l so “Premiu al Meyor Cantar”, celebrándose la Gala d’Entrega nel mes de febreru, con motivu del Día Internacional de la Llingua Materna. Esti premiu va tener el carácter de clasificatoriu oficial del Festival Européu –garantizándose que’l ganador va ser el representante oficial d’Asturies nel Liet International-, y na so organización el Gobiernu del Principáu va contar cola Fundación Liet. Pola so parte, la Fundación Liet International aceptó la candidatura d’Asturies pa organizar el Festival Européu de la Canción en Llingües Minoritaries nel añu 2012. Reunión de socios de la Fundación Liet: con carácter previu a la celebración del Festival, el vienres 26 de payares, a les 15.00 hores, va desarrollase n’An Oriant/Lorient (a bordu del barcu frisiu Thalassa) una reunión de los socios del Liet International, onde Asturies, na so calidá de sociu estratéxicu de la Fundación, va tar representada pola Directora Xeneral de Política Llingüística, Consuelo Vega Díaz. Nella van tratase asuntos talos como los alcuerdos de collaboración o una visión de futuru del Liet International. El Festival Liet ye una gran oportunidá pa dar a conocer el fechu llingüísticu asturianu fuera de les nuestres fronteres y pa mostrar la calidá y la madurez de la música fecha n’asturianu na actualidá.
Congresu “Asociación pola diversidá 2010 (Partnership for Diversity 2010)”
Con anterioridá a la celebración del Festival Liet, el mesmu sábadu 27 pela mañana, va desarrollase’l congresu añal tituláu “Asociación pola diversidá” (Partnership for Diversity), organizáu pol Conseyu d’Europa en collaboración, esti añu, con diverses organizaciones culturales bretones. Col títulu d’“El papel de los derechos culturales y llingüísticos na construcción de la sociedá europea” (“The role of cultural and linguistic Rights in building a European society”), ente les 9.00 y les 15.40 hores va desarrollase un programa intensu onde van participar representantes de diverses comunidaes llingüístiques y organismos europeos. La Directora Xeneral de Política Llingüística del Principáu d’Asturies, Consuelo Vega Díaz, va presentar la ponencia “La llingua asturiana y la so contribución a la diversidá cultural europea”.
(de la Dirección Xeneral de Política Llingüística, 25-22-2010)
Deixar ua Respuosta