La Xunta pola Defensa la Llingua Asturiana (XDLA) acaba d’anunciar los ganadores de los Premios Andrés Solar na so XXVI edición. El Pegollu ye’l premiu a la entidá o persona que rescamplara nel últimu añu pol so llabor en defensa o promoción del asturianu: nesta edición foi pal trabayu del equipu del programa Camín de Cantares. El Madreñazu, el gallardón que reconoz a la persona o entidá que destacara pol so llabor negativu pa cola llingua asturiana: el premiu foi pa Herminio Sastre, conseyeru d’Educación y Ciencia del Principáu d’Asturies.
La Xunta quier reconocer col Pegollu’l trabayu de tol equipu que fai posible’l programa Camín de Cantares y, en concreto, al responsable de la idea orixinal, Ramón Lluis Bande y al conductor del programa, Xosé Antón Fernández, Ambás. La Xunta «quier reconocer l’usu que fai de la llingua asturiana esti programa, nun exemplu de normalidá y puesta en valor de les nuestres señes d’identidá». Añaden que «la recuperación de les tradiciones, sobre manera nel ámbitu musical, y too ello cola conducción del propiu programa col asturianu como llingua vehicular, son dalgunes de les razones poles que se dan esti premiu, y pol so exemplu de que l’asturianu nun ye un llastre, sinón daqué que xuega al nuestru favor».
El Madreñazu quier premiar al Conseyeru d’Educación y Ciencia por calificar como «espilfarru» l’aplicación de la llei qu’elimina la ratio d’ocho alumnos pa poder estudiar asturianu, amás d’anunciar recursu contra la sentencia, colo que la Xunta pola Defensa de la Llingua Asturiana considera «qu’Herminio Sastre ye bon merecedor d’esti gallardón». La entrega de los Premios va facese’l día 18 d’avientu a les 19.30 hores nel Salón d’Actos del Antiguu Institutu de Xixón. L’actu va contar cola actuación musical de dellos músicos de la escena folk asturiana, que van facer reellaboraciones de temes tradicionales asturianos. Tamién, como tolos años, depués del actu va haber una espicha.
(de Les Noticies, 13-12-2010)
Deixar ua Respuosta