Daniel Cueli: “La reivindicación de los drechos llingüísticos vive un momentu de baxa actividá”

INACIU GALÁN

Daniel Cueli ye’l director de la revista “N’ast, cartafueyos d’ensayu”, qu’espubliza l’asociación N’ast. El chigre L’Ayalga de Xixón recibió esti xueves la presentación del so númberu seis. Falamos con él de los conteníos de la revista, del so percorríu y de les actividaes de l’asociación que la edita, amás del momentu que vive’l movimientu de reivindicación llingüística n’Asturies.

Acaben d’espublizar el númberu seis de la so revista “N’Ast. Cartafueyos d’ensayu”, ¿qué conteníos inclúi?.
Los más de los conteníos d’esti númberu xiren al rodiu de la llingua y lliteratura asturianes. Asina, Xuan Porta Allende reflexona sobre la situación llegal de la llingua asturiana anguaño; nuna llinia asemeyada, David Gimeno i Ayuso espón la importancia que tien la oficialidá d’una llingua pa garantizar la so supervivencia; Inaciu Galán y González da a conocer la figura del escritor Antón Forascepi; Xaviel Vilareyo y Villamil ufre’l vocabulariu asturianu emplegáu pol escritor José María de Pereda na so obra lliteraria; y, pa rematar, asoléyase’l pregón de la Fiesta de la Oficialidá de la Llingua Asturiana de 2010, dau por Xulio Elipe Raposo “Xune”. Amás, inclúise un ensayu de calter hestóricu, de Javier Cubero de Vicente, col que viaxamos hasta’l Perú pa conocer el movimientu políticu Alianza Popular Revolucionaria Americana. Creyemos que mos quedó un númberu bien prestosu.

La revista ye una de les d’ensayu más variaes, si la comparamos con “Lletres Asturianes”, “Cultures”, “Asturies, memoria encesa d’un país”, “Erada”, etc. ¿Yera necesario cubrir un güecu pa trabayos que nun encaxaben neses revistes?.
“N’Ast. Cartafueyos d’ensayu” nun nació necesariamente con esi enfotu. Pero sí ye cierto que, col tiempu, vieno a asumir esa función. De les revistes citaes, “Cultures” y “Asturies, memoria encesa d’un país” céntrense, principalmente, na etnografía, “Lletres Asturianes” en llingua y lliteratura y “Erada” na hestoria. La nuesa revista abarca toes eses temátiques y dalguna más (yá s’asoleyaron artículos sobre otros munchos temes, dende l’actualidá político hasta la ecoloxía) y ye que pensamos nuna revista na que pueda escribir quien quiera y sobre lo que-y pete (de momentu, nunca nun refugamos nenguna collaboración). Pero bono, lo importante ye que, ente les citaes y dalguna más qu’hai per ehí, tenemos un bon garapiellu de revistes d’ensayu en llingua asturiana y toes se complementen mui bien.

Nel entamu dicen que nesti númberu estrenen la collaboración del Conceyu de Bimenes, ¿en qué consiste?.
La verdá ye qu’aprovechamos la circunstancia de que yo mesmu, director de la revista, trabayo ellí. Nel Ayuntamientu Bimenes llevaben tiempu cola idega d’espublizar un cartafueyu nel qu’apaeciesen los pregones de la Fiesta de la Oficialidá de la Llingua Asturiana, pero teníen dos problemes: l’económicu y l’ausencia de la trescripción de dalgunos de los que se dieron nos primeros años de la celebración. Poro, llegóse a un alcuerdu cola responsable de la Estaya de Cultura, Nati Canto, pa dir asoleyando en “N’Ast. Cartafueyos d’ensayu” los que sí se conservasen (eso sí, siempre que se cuntase tamién col vistu bonu del autor). D’esta manera, el beneficiu ye pa dambes partes: l’Ayuntamientu Bimenes consigue, en cierta midida, lo que quería y nós cuntamos con un material p’asoleyar na revista que mos paez perinteresante.

¿Ye complicao consiguir collaboraciones?
Magar lo que pueda paecer, yá que nos seis númberos espublizaos hasta’l momentu cuntamos cola collaboración de trenta autores estremaos, sí que ye complicao; anque, más que consiguir collaboraciones, lo difícil en munchos casos ye llograr que les persones que se comprometen a apurriles les entreguen en tiempu y forma. Pero bono, de momentu tampoco mos podemos quexar. Amás, hai una riestra d’autores, a los que podríemos llamar “fixos”, que yá escribieren delles vegaes na revista y colos que siempres podemos cuntar, dalgo polo que-yos tamos mui agradecíos.

¿Y collaboraciones económiques pa que salga alantre la publicación?.
Pa espublizar la revista cuntamos con trés fontes de financiación, que son: los ingresos xeneraos pola venta de la mesma; los fondos colos que cunta l’Asociación Cultural N’Ast (y que, como en cualesquier coleutivu d’esti tipu, salen de les cuotes de los socios y de la venta de material propagandísticu, principalmente); y, por último, la sovención que mos apurre la Conseyería de Cultura y Turismu. Home, hebo momentos d’apuru, nos que les perres nun llegaben, pero de momentu el proyeutu ta siendo económicamente vidable.

Dempués de cuasi cuatro años saliendo, ¿qué balance faen?.
Positivu. Per un llau, porque la revista sigue asoleyándose y eso, nos tiempos que cuerren, yá ye un trunfu y, per otru, porque cumplimos los oxetivos que mos marcamos nel Entamu del so primer númberu, principalmente’l de ser una espublización abierta a tou aquel/aquella que tuviere daqué que dicir y na que pudieren vese espeyaes opiniones y reflexones de tou tipu y sobre estremaos temes. Prueba d’ello ye la importante riestra de persones venceyaes al movimientu políticu, social y cultural asturianu que yá escribieren nes páxines d’estos cartafueyos y a les qu’esperamos sumar munches más qu’andechen con nós nesti proyeutu.

¿Qué difusión tien la revista, ye complicao consiguir que llegue al públicu?
La revista repártese de baldre ente los socios de l’Asociación Cultural N’Ast y ente los autores que collaboren en cada númberu. Pal públicu en xeneral ta a la venta en delles llibreríes d’Uviéu y Xixón y, amás, pue consiguise por internet, al traviés de la páxina web de Llibros de Nós (iniciativa d’Espublizastur, que ye la que mos fai la xestión editorial de la revista) o del corréu lletrónicu de l’asociación: info@n-ast.org. Precisamente, gracies a internet nun ye complicao llegar al públicu. Pero la xente que tea avezao a mercar la revista nes llibreríes va alcontrase, por desgracia, con dos puntos de venta pesllaos, Trabe y Alborá, que yeren mui importantes pa nós. Asina qu’intentaremos distribuyir la revista per dalguna llibrería más, incluso d’otros puntos d’Asturies.

¿Qué-yos queda por meyorar na revista?
La verdá ye que la revista gústamos como ta. Pero bono, por dicir daqué, quiciabes mos prestaría la posibilidá de meter semeyes en color; dalgunos ensayos vienen acompañaos de semeyes, pero tienen que ser en blanco y prieto. Pero eso agora mesmo nun ye vidable, yá que tendríemos que camudar el tipu de papel que s’emplega y al meter fueyes en cuatricomía, saldría muncho más caro. En cuantes a los conteníos, echamos en falta más artículos d’analís políticu. Y tamién lo que comentábamos na rempuesta anterior, no tocante a la distribución, prestaríamos tar en más puntos de venta. Pero too esto por dicir dalgo, porque en llinies xenerales la revista gústamos como ta.

La revista edítala l’Asociación Cultural N’Ast, que, sacante la publicación d’estos cartafueyos d’ensayu, llevaba dalgún tiempu inactiva. Agora tornen a sacar comunicacos, ¿qué-yos fai volver a apaecer nel movimientu de reivindicación llingüística?
Siempres tuvimos ehí. Ye cierto que de la que s’entamó cola asociación, amás d’espublizar la revista, asoleyamos unos cuantos comunicaos y un montón de material propagandísticu ya incluso entamamos dalguna concentración ciudadana reivindicando la oficialidá del asturianu, pero les persones que tiramos d’esti carru tamos a milenta coses, sacar alantre la revista lleva munchu tiempu y desdexamos tolo demás. Volver a apaecer activamente nel terrén de la reivindicación llingüística nun foi premeditao, simplemente pensamos que como’l proyeutu editorial yá ta consolidáu, yera hora de retomar delles custiones, más agora qu’esti movimientu reivindicativu tien un nivel baxu d’actividá.

¿Vive entós un mal momentu la reivindicación de los drechos llingüísticos n’Asturies?
Nun ye que viva un mal momentu, pero como tolos movimientos tien altibaxos y, como dicíamos enantes, agora mesmo hai un nivel baxu d’actividá y eso que mos empobinamos a una dómina que pue ser importante pa la llingua asturiana: elecciones nacionales y de conceyu nel próximu mes de mayu que darán entamu a una llexislatura que quiciabes seya la de la reforma del Estatutu d’Autonomía. La reivindicación de los drechos llingüísticos tien que tar un día sí y otru tamién na cai, nes instituciones, nos medios de comunicación, na sociedá en definitiva, y nós tratamos d’aportar lo que podemos en función de les nueses posibilidaes.

¿Tienen pensao entamar dalgún tipu d’acción más dende N’Ast?
Amás de siguir trabayando na revista y retrucar públicamente a toos aquellos ataques que sufre la llingua asturiana, tamos dándo-y vueltes a la posibilidá de facer dalguna campaña coincidiendo col procesu electoral viniente, anque tovía nun lo tenemos mui definío.

(d’Asturnews, 28-01-2011)