El área de Política Llingüística del Conceyu de L.lena va poner en marcha nos próximos díes una campaña de promoción de la llingua asturiana destinada a les panaderíes del conceyu. La pretensión ye recuperar les denominaciones na variante ’l.leniza’ de les distintes clases de pan.
Al traviés d’esta campaña nueva, que se suma a otres puestes en marcha dende esta área de l’alministración local y empobinaes al comerciu, como’l repartu de cartelos de Rebaxes, y otros específicos pa pescaderíes y carniceríes, van repartise un total de 500 bolses pal pan col lema: “Que nun t’esfaraguye’l pan”, la campaña cunta con un presupuestu de 1.000 euros, na que s’inclúi una subvención de la Conseyería de Cultura y Turismu.
Trátase d’una campaña del Serviciu de Normalización Llingüística cola que recuperar el vocabulariu del conceyu. Los términos tienen como fonte “El habla de Lena” obra del profesor Jesús Neira, fináu apocayá.
Asina, apaecen términos como: pamesto, cuirnu, resqueñu, mol.lena… Amás, y al tratase de bolses d’algodón, la pretensión ye siguir la llínea ecolóxica siguida pola alministración local nestos últimos años. Ello ye que nuna pasada campaña yá repartió bolses pa la compra col lema: Reduz, Reutiliza y Recicla y ¿tu que faes pa curiar el mundu?.
(d’Aruelu, 25-02-2011)
Tierra alantre, la mesma fala 
Deixar ua Respuosta