La revista «Cultures» publica un númberu nuevu

La revista Cultures, publicación de l’Academia de la Llingua Asturiana dedicada a l’antropoloxía cultural y que se distingue por usar l’asturianu como vehículu d’espresión del conocimientu científicu y enfocar l’estudiu antropolóxicu a partir del carácter diferencial de la cultura na que surde, acaba de publicar el númberu 16.

La publicación, dirixida pol secretariu de l’Academia, Roberto González-Quevedo, tien yá diez años de vida y lo más destacao d’esti númberu ye la publicación d’un estudiu hasta agora inéditu de la escritora l.lacianiega Eva González Férnandez, qu’hasta la so muerte nel 2007 yera la decana de les nuestres lletres. La escritora dexó ensin espublizar munches obres y enantes de morrer entregó-y a la familia documentos y cuadernos pa que los foren publicando según-yos pareciera. Asina, queden por dar a conocer testos etnográficos, vocabularios, cantares y refraneros, porque los cuentos y narraciones yá s’editaron de forma conxunta nel 2008 baxo’l nome de Cuentos Completos. Per otru llau, la familia d’Eva González espera poder publicar l’añu que vien l’autobiografía de la escritora, titulada Hestoria de la mía vida, hasta’l momentu inédita. L’estudiu agora espublizáu, «Etnografía de Palacios de Sil», escritu nel asturianu propio d’esta tierra, fai un percorríu peles tradiciones, creencies, trabayos, vezos y cantares de la zona.

Nesti númberu nuevu de Cultures, tamién s’inclúi l’estudiu «Los cuentos tradicionales asturianos: un averamientu a la cultura asturiana al traviés de los cuentos de tresmisión oral na obra Contáronmelo pa que lo contara, de Milio’l del Nido», de Santiago Fano; «La música nel conceyu Proaza», d’Antonio Alonso de la Torre García y Francisca Iglesias Álvarez; y «Xuegos nel Alto Ayer», de Covadonga González Muñiz. Amás, la revista tien tamién una sección de reseñes, onde se fala de les obres La chute du ciel. Paroles d’un chaman yanomami, de Davi Kopenawa y Bruce Albert, titulada «Camín del acabóse»; Retour aux sources, de Françoise Héritier, titulada «Alcordanza del informante»; y L’adieu au voyage. L’ethnologie française entre science et littérature, de Vincent Debaene, col títulu de «L’antropólogu como escritor».

(de la Estaya d’Asturianu de la RTPA, 04-03-2011)