TPA va estrenar el diccionariu audiovisual del asturianu Dicires, que consta de 120 microespacios con una duración d’ente 20 y 40 segundos, lo que va permitir la repetición del programa cinco veces al día. Dende TPA señalen que l’espaciu val p’apoyar de manera orixinal y atractiva la presencia del asturianu na so programación.
Asina, el programa va emitise nestos horarios: enantes de Mirasturies: el pasáu recién, a les 09:45; enantes de TPA Noticias 1.ª edición, que principia a les 14.00; enantes del programa Conexión Asturias, a les 18:00; enantes de TPA Noticias 2.ª edición, que principa a les 20.30; y enantes de TPA Noticias 3.ª edición, que s’emite a les 00.30.
Dicires ye una producción de TPA en colaboración con Ediciones Trabe y cuenta col asesoramientu llingüísticu del escritor Antón García y la realización de Juan Tizón y Sofía Castañón. Cada programa inclúi una selección de términos propios del asturianu y del gallego-asturianu. Les palabres incluíes tán escrites y pronunciaes n’asturianu y traducíes, al final de cada espaciu, al castellanu, inglés, árabe, rusu y chinu. Na parte final de cada episodiu delles cares pronuncien nes sos llingües la palabra asturiana a la que se refier el spot.
Esta serie ta realizada n’alta definición y tien un formatu reconocible qu’inclúi delles propuestes estilístiques onde cada palabra defínese con una imaxe, una acción, un soníu, un diálogu, una suxerencia poética o una música. A la hora d’ilustrar les palabres, combinen imáxenes de dellos ambientes d’Asturies grabaes espesamente pa la serie: rural y urbanu, mineru y marineru, y mozu y adultu. Amás, l’espaciu quier apartase de los paisaxes típicos asturianos y potenciar la imaxe actual y moderna del país.
(de Les Noticies, 07-03-2011)
Tierra alantre, la mesma fala 
Deixar ua Respuosta