INACIU GALÁN
En xunetu Dulce Xil Fernandi cumple quince años al frente de la Llibrería Paraxuga col sofitu de la so hermana Yolanda, primero na cai Independencia y dempués, como llibrería-chigre, na cai Paraísu d’Uviéu. Agora y tres lluchar abondo pol negociu, la hestórica llibrería va echar el pieslle nos meses vinientes, como lo ficieren primero la Llibrería Trabe, tamién n’Uviéu, y Alborá Llibros, en Xixón. A poques hores del Día del Llibru dase la noticia, Asturies yá nun va tener nenguna llibrería dedicana n’esclusiva al llibru asturianu, ¿por qué?. D’esta y d’otres cuestiones falamos con Dulce, que conoz perbién un mercáu nel que lleva más de dos décades.
Dempués de quince años d’actividá deciden echar el pieslle, ¿nun hai mercáu pal llibru asturianu o falta compromisu y militancia cultural?
El compromisu de mercar n’establecimientos que sofiten la llingua asturiana, asina como la cultura asturiana en xeneral, ye mínimu, la xente prefier los centros comerciales sabiendo’l perxuiciu que faen al comerciu tradicional.
¿Cómo surdió’l proyectu de Paraxuga?
En 1996 surde’l proyectu de Paraxuga nun llocal de la cai Independencia,la que ñaz como una llibreria especializada en publicaciones en llingua asturiana y temática d’Asturies asina como de cultura celta, tórnase bién ceo nun espaciu d’alderique que destaca pola llibertá d’espresión. Asina celebrárense presentaciones de llibros, alcuentros d’escritores, charres de cultura asturiana en xeneral.
En 2007 tocóvos entamar cuasi de cero otra vegada…
Nel 2007 entama una nueva etapa de Paraxuga, cambiamos de sitiu, magar non de filosofia, fuimos pal centru héstoricu d’Uviéu, pa la cai Paraísu númberu 2, xunto la vieya muria medieval y la famosa fábrica’l gas, y ficimos de Paraxuga’l primer café llibreria de la ciudá d’Uviéu. Agora dempués de quince años echamos el pieslle, fadrémoslo’l 31 de xunetu.
¿Hasta qué puntu tien la alministración asturiana responsabilidá nel esbarrumbe de la industria editorial asturiana?
El Gobiernu asturianu ye’l gran responsable de la llaceria na que nos atopanos les y los asturianes, por nun sofitar la llingua asturiana y reconocer la oficialidá, que dicho de pasu ye un drechu que tenemos, otros culpables son los sindicatos, los medios de comunicación que callen como afogaos cola represion que fai’l Gobiernu yá seya na estaya d’educación, cultural musical, llaboral etc. La burocrácia ye unu los actos mas represores qu’usen les alministraciones cola xente emprendedora nacionalista d’Asturies yá seya Conceyu o Conseyeria, poniendo torgues a los proyectos y faciendo etenra la espera pola llicencia.
¿Qué podría facese dende les alministraciones?
En llugar de poner torgues, lo que teníen de facer dende l’alministración asturiana ye crear proyectos serios asturianos sofitándose na llingua de nueso y la cultura d’Asturies, que son una ayalga y la tienen estrapayada y reprimida y dempués, tamién la xente tien la so responsabilidá porque tien el deber de reivindicar y nun recular énte tanta política antiasturiana dende’l Gobiernu y demás xestores de los bienes d’esta nación asturiana, que son munchos y perbonos.
¿Qué ye lo que más va echar en falta d’esti trabayu?
Lo que más en falta voi echar del mio trabayu na llibreria Paraxuga ye’l tratu cola xente ya los alderiques que se faen equí. Y tamién los cantarinos qu’una vegada al mes facemos cola xente del barriu y demás persones que vienen a cantar. Dende’l puntu de vista profesional pa min va ser un palu porque dende bien moza trabayé siempres en llibreria, primeru en Santa Teresa y dempués con Yolanda, la mio hermana, ficimos Paraxuga.
Y pa despidime, date les más fonderes gracies pol to sofitu y tamién agradecer a tola xente que nos sofitó nestos años d’una mena o otra y convidar a toles persones que-yos preste, pal 31 de xunetu de 2011 a pesllar Paraxuga con nosotres de una mena prestosa y tomando unos culinos.
(d’Asturnews, 22-04-2011)
Deixar ua Respuosta