La coalición Bloque por Asturies-UNA, denuncia una vegada más la discriminación llingüística que nesti casu se dio ayeri, cuando la Xunta electoral de zona de Llaviana comunicó a los representantes llegales de la coalición en Llangréu y Samartín del Rei Aurelio, Manuel Benayas Bode y Gustavo Álvarez Tuya, que les sos candidatures yeren refugaes por presentase en llingua asturiana. El motivu qu’argumenta la xunta electoral de zona ye que l’asturianu nun s’atopa reconocíu como llingua oficial.
Esta decisión va en contra de la sentencia 48/2000 de 24 de febreru del Tribunal Constitucional, que yá se pronunciaba a favor del usu del asturianu na presentación de candidatures electorales, y que tamién consideraba que refugar una candidatura por esti motivu, yera vulnerar el derechu de les persones a acceder a los cargos públicos en condiciones d’igualdá.
Per otra parte, cabo destacar que tantu na Xunta Electoral Provincial onde s’inscribieron les candidatures del centru, oriente y occidente, como nel restu de Xuntes de zona, onde se presentaron 18 candidatures con formularios n’asturianu, toes elles fueron almitíes ensin nengún tipu de problema.
Finalmente dende Bloque por Asturies-UNA anunciamos que se va recurrir y va esixise l’aceptación de les candidatures.
(de Glayíu, 22-04-2011)
Tierra alantre, la mesma fala 
Deixar ua Respuosta