El discu «13 X Mánfer» musica la obra del escritor llangreanu

Por iniciativa de la Conseyería de Cultura del Gobiernu d’Asturies edítase’l discu tituláu 13 X Mánfer, que tien como oxetivu recuperar parte de la obra poética del escritor llangreanu Manuel d’Andrés Fernández, que firmaba col nomatu de Mánfer de la Llera. Nél, trece intérpretes y grupos musicales del país adapten y faen suyos poemes que convierten en lletres de canciones. El resultáu final ye un álbum representativu de los distintos sones que pueden sentise na escena musical n’asturianu, y tamién fai rescamplar la musicalidá que guardaben estos testos.

Ábrese’l trabayu con una sesión d’electrofolk a cargu de Sergio Rodríguez, onde pue sentise la voz del propiu Mánfer recitar el poema «Nueche d’insomniu»; sigue la voz d’Anabel Santiago faciendo una tonada del testu «Cuando»; ensin dexar la canción asturiana, anque nesti casu más llixera, los Hermanos Valle Roso, col acompañamientu del pianu, dialoguen vocalmente con «Silenciu». Depués adiéntrase’l discu pel terrén de la canción d’autor con cuatro representantes: Xabel, del que se recupera’l tema «L’Asturies eterna» (aparecíu hai años nel so únicu discu, onde precisamente ponía música a dellos testos de Mánfer); Toli Morilla, del que tamién se rescata una pieza grabada enantes, «Nueche d’insomniu» (tema central del espectáculu del mesmu nome); Alfredo González, que pon el so estilu particular al serviciu de «Tracamundiu»; y Xel Pereda (miembru de Llan de Cubel y guitarrista de la banda qu’acompaña a Nacho Vegas), que firma una pieza titulada «Soledá». La conexón col tiempu del escritor homenaxáu llega cola recuperación d’una formación histórica que perteneció al movimientu del Nuevu Canciu Astur, Renacencia, que vuelven a xuntase pa grabar en clave de pop-rock sesenteru «Les hores muertes». Pela so parte les pandereteres d’Herbamora y el grupu d’intérpretes que les acompaña convierten nun ramu tradicional la poesía «Atetuyu ante la muerte». La grabación sigue pelos soníos más folkis con Felpeyu y la so adaptación de «La carbonera». L’electrofolk vuelve con Xera y la so versión épica, fiel a la so manera d’entender la música, del poema «Yo quixera». Nos últimos momentos de «13 por Mánfer» la música más urbana y contemporánea faise protagonista con Dark la eMe y la so adaptación hiphopera d’«Asturies, patria querida» (nada que ver col himnu), quiciabes lo más llamativo de tol discu. Ciarra esti homenaxe musical a Mánfer de la Llera’l grupu Dixebra, que convierten «Contrastes» nun cantar de ritmu frenéticu con toques surf y funk.

Otra manera, el próximu miércoles 4 de mayu va facese la presentación oficial d’esti discu con un actu nel Teatru Nuevu de La Felguera (20:00 hores) nel que van actuar Alfredo González, Felpeyu, Hermanos Valle Roso, Dark la eMe, Renacencia, Toli Morilla y Xera.

(de la Estaya d’Asturianu de la RTPA, 03-05-2011)