El miércoles 25 de mayu, na Casa Conceyu de Xixón, presentóse El pallabreru del ciclismu, tercera de les publicaciones dedicaes al mundu del deporte, editada pola Oficina Municipal de la Llingua del Conceyu de Xixón. Nel actu tuvieron presentes l’alcaldesa en funciones de Xixón Paz Fernández Felgueroso; el conceyal de Política Llingüística, Jesús Montes Estrada; el conceyal de Deporte, José Ramón Tuero; la responsable de la Oficina Municipal de la Llingua, María Xosé Rodríguez López; el ciclista xixonés Chechu Rubiera; el presidente de la Federación Asturiana de Ciclismu; y les autores del testu, Cristina Bobes Limenes, María Cuervo Escribano y la propia María Xosé Rodríguez. Estes tres escritores recopilaron más de doscientos términos rellacionaos col mundu del ciclismu y la bicicleta.
Ye esti’l terceru de los palabreros vinculaos al ámbitu de lo deportivo que s’espubliza pa crear y difundir material específico del mundu del deporte, al tiempu que se fai un llabor de sensibilización y normalización del usu del asturianu tanto dende los clubes o entidaes deportives como dende los distintos departamentos y conceyalíes de Xixón.
El llibru trata de los distintos tipos de carreres ciclistes, del equipamientu necesariu, de les acciones que se faen al pedaliar, amás de dellos conseyos de seguranza na carretera pa los y les ciclistes y con una llista de los ciclistes asturianos más renomaos, dende Vicente López Carril hasta Daniel Navarro. El Pallabreru del ciclismu –del que s’editaron 2.000 exemplares– va repartise ente los usuarios y usuaries de les instalaciones deportives y les asociaciones de ciclistes de Xixón al travies del Patronatu Deportivu Municipal y ente tola xente interesao al traviés de la Oficina Municipal de la Llingua.
(de Les Noticies, 26-05-2011)
Tierra alantre, la mesma fala 
Deixar ua Respuosta