Macadamia ye formación relativamente nueva que quier presentase a la escena musical del país con una propuesta realmente orixinal. La so vida curtia como grupu estable, aproximadamente un añu y mediu, nun quita pa que los sos integrantes tengan una esperiencia más qu’allargada na escena asturiana. Éstos son: Pablo Souto (baxu), José Mayordomo (guitarra eléctrica), Kiko Flores (saxo), Marcos G. Alonso (acordión) y Oti Méndez (voz); a toos ellos hai qu’añadir les bateríes que, pa la ocasión, de manera escepcional, tocó Miguel Herrero, productor musical del discu.
Nel primer discu d’esta formación, editáu estos díes, podemos atopar folk, jazz o funk, pero ensin perder la conexón colos soníos de la tierra, dalgo que nun quieren desdexar nesti trabayu de nome homónimu publicáu por Discos L’Aguañaz/Ámbitu. La mayoría de les pieces surdieron de la inspiración d’ellos mesmos, anque tamién rexistraron dalguna qu’otra pieza tradicional. Les lletres siguen les pautes de les canciones populares, con temes que falen del amor-desamor o la señaldá, pero tamién con sitiu pa otres de calter más social. Nótase nelles la influencia de la poesía que tien l’orixe nel pueblu, con testos cenciellos pero enllenos de guapura y llirismu.
Toes estes característiques faen de Macadamia una de les formaciones que más pue apurrir al panorama de la música asturiana contemporánea. La so filosofía d’heteroxeneidá absoluta, pero teniendo claro cuál ye’l puntu de partida, ye quiciabes lo que más los define, xunto al so espíritu jazzeru y lo particular de la so instrumentación –onde sobresal la combinación d’ acordión y saxu–. Igüen asina un soníu propio que, de xuru, a poco que se conoza va singularizalos dientro de les bandes que canten n’asturianu.
(de la Estaya d’Asturianu de la RTPA, 29-05-2011)
Tierra alantre, la mesma fala 
Deixar ua Respuosta