HÉCTOR M. PALACIO
El Conceyu Bimenes ta acabante de presentar el programa d’actos de la decimoquinta edición de la Fiesta de la Oficialidá de la Llingua Asturiana, cola que conmemora la hestórica fecha del 5 de xunetu de 1997, na que’l Plenu Municipal aprobó la oficialidá de la llingua asturiana nel territoriu yerbatu. Lliteratura, cine, teatru, monologuismu, música y los yá tradicionales pregón y misa, too ello col asturianu como llingua vehicular, tienen cabida nel programa d’esti añu, con actividaes que se desendolcarán ente’l 22 de xunu y el 2 de xunetu
Los actos principien el miércoles 22 de xunu cola esposición de les obres presentaes al VII Concursu de Cómic n’Asturianu de la Comarca de la Sidra, y van siguir el llunes 27 de xunu cola presentación del llibru Canigú lliterariu y la llectura de testos n’asturianu por autores de la Comarca de la Sidra. El martes 28 de xunu los actos van siguir cola proyección de Los viaxes de Gulliver, y el 30 de xunu va representase la obra teatral Xuacu y Telva.
El vienres 1 de xunteu va facese la entrega de premios del XIV Concursu de Cuentos pola Oficilidá del Asturianu y llectura pública de la obra ganadora del primer premiu na voz del so autor. Los asistentes van poder asistir tamién a la actuación de Ludovino Díaz González, Pin de la Cotolla. Adolfo Camilo Díaz ye esti añu l’encargáu de dar el pregón el sábadu 2 de xunetu en Martimporra a les 12.30 hores. Depués va entamar una misa n’asturianu, y la actuación del Ensame de Música Tradicional y del Grupu de Baille de Los Yerbatos. Esi mesmu día pela tarde va facese en Santuyano’l XII Concursu de Gaiteres y tamién va tocar el grupu folk Ná que contate.
ANEXU: Programa de la XV Fiesta de la Oficialidá de la Llingua Asturiana.
(de Les Noticies, 13-06-2011)
Tierra alantre, la mesma fala 
Deixar ua Respuosta