El 21 de xunu, coincidiendo col final de les actividaes llectives n’Educación Primaria y Secundaria, acaben les actuaciones previstes dientro del programa de l’Axenda Didáctica-Escolar 2010-2011, qu’organiza la Conseyería de Cultura y Turismu cola collaboración de la Conseyería d’Educación y col oxetivu d’averar la creación cultural n’asturianu y gallego-asturianu a los escolinos y escolines. Con un presupuestu de 110.000 €, la Dirección Xeneral de Política Llingüística echó a andar col empiezu del presente cursu escolar un programa d’actividaes que duplicaba la ufierta del cursu pasáu. Nesi programa había actuaciones lliteraries, musicales, teatrales, cuentacuentos, monólogos y hasta una ópera bufa.
Ufiertáu a tolos centros educativos públicos y concertados d’Asturies, de Primaria y Secundaria, zarróse una programación de 156 actuaciones qu’atendió’l total de peticiones recibíes. Les actividaes, adaptaes a les distintes edaes del públicu, llegó nesta edición a un total de 201 centros d’Asturies (152 de Primaria y 49 de Secundaria). L’oxetivu d’esti programa ye, d’un llau, apoyar el llabor docente del profesoráu de llingua asturiana y, d’otru, facer ver a los alumnos y alumnes que l’asturianu y el gallego-asturianu son daqué más qu’una asignatura: son una llave que-yos permitirá pasalo bien y valorar l’abondosa creación musical, lliteraria o teatral que s’espresa n’ellos.
La ufierta de la Axenda didáctica-escolar 2010-2011 incluyó un total de 42 actividaes distintes, 26 d’elles ofrecíes a los centros d’Educación Primaria y 16 a los de Secundaria y Bachiller. Once actividaes taben diseñaes pa que l’alumnáu asturianu se familiarizare col panorama musical de la mano de persones relevantes de la nuestra actualidá, como Anabel Santiago, Xuacu Amieva, Mestura, Xentiquina, Esteban González, Dani García, Diego Pangua, Xosé Antón Fernández (Ambás), Lisardo Prieto, Florentina Cuadriello cola collaboración de les Pandereteres de Fitoria, Mezá, Toli Morilla y Xune Elipe (Dixebra). Tamién fueron once les actividaes relacionaes cola lliteratura, qu’analizaron la actualidá poética, el cómic y la lliteratura infantil y xuvenil. Dirixéronles los escritores Chechu García, Iris Díaz Trancho, Marisa López Diz y Mar Martín de la mano de la Editorial Pintar-Pintar. Les artes escéniques taben presentes nun total de nueve actividaes cola participación de Teatru Muxotatu (Adolfo Camilo Díaz y María López Barrio), Milio’l del Nido con Escenapache, Asturmitomanía, Higiénico Papel, Quiquilimón, Factoría Norte, Teatro Kumen y Yheppa. Novedaes na programación d’esti cursu fueron la presencia del monólogu y los cuentacuentos con profesionales como Carlos Alba “Cellero”, Olga Cuervo y Acostubaxo Teatru; y la incorporación de la representación de la ópera bufa Bastián y Bastiana de Mozart dirixida por Producciones Nun Tris.
(de la Dirección Xeneral de Política Llingüística, 16-06-2011)
Tierra alantre, la mesma fala 
Deixar ua Respuosta