La editorial Publicaciones Ámbitu acaba de sacar a la cai’l llibru de Francisco Pimiango Les Bruxes2. Paquín va a escuela, segunda parte de la serie que principiara Bruxes males, bones bruxes. La historia tien como protagonista a Paquín, el neñu qu’adoptaren les bruxes bones del primer cuentu de la serie.
Paquín tien qu’empezar a escuela pero nun va ser un cursu corriente: los compañeros de la clas van quedando cada vez más atristayaos depués de lleer un llibru y a la maestra empiecen a sali-y unes verrugues que dan mui poca confianza. Pa enriba, los otros neños nun garren en serio a Paquín cuando-yos diz que tien tres madres. Pero, de sópitu, va pasar dalgo que va facer el dir a escuela toa una aventura.
La colección onde ta publicáu Paquín va a escuela, ta basada n’histories mui entreteníes y ilustraciones de gran calidá, lo que los fai mui atractivos pa los llectores más pequeños. Na parte gráfica destaquen, sobre manera, la espresividá de los personaxes y les testures de les manches de color.
Francisco Pimiango (Pimiango, Ribadeva, 1973) ye profesor de Filosofía y, anque diz él que ye «a cachos, ilustrador», dende l’añu 2009 tien publicaos –como dibuxante namás o como autor tamién del testu– seis llibros: El Nuevo Mundo, d’Alicia Barberis; Historia d’un árbol, de Ramón Lluís Bande; L’horru, de J. L. Fernández; Quiero mercar una hermanina, de María Luz Pontón; y los dos de los que ye tamién l’autor de la historia: Bruxes males, bones bruxes –que conoció yá una traducción al gallego-asturianu, Bruxas ruías, búas bruxas– y Paquín va a escuela.
(de la Estaya d’Asturianu de la RTPA, 20-06-2011)
Deixar ua Respuosta