Vicente Gotor: «Que la xente nun s’alarme: vamos incluír l’asturianu»

DAMIÁN BARREIRO

Vicente Gotor, rector de la Universidá d’Uviéu, refirióse en declaraciones a Les Noticies.com a la polémica sobre la presentación de tesis doctorales n’asturianu. Según Gotor, el rectoráu va estudiar la propuesta y ver de qué manera pue quedar recoyida la nuestra llingua: «Va facese una enmieda pa que l’asturianu nun quede fuera. Hasta que nun sía definitivo, que la xente nun s’alarme. Agora’l reglamentu ye provisional». El rector afirma que dende la institución fixeron públicu’l reglamentu, «que ye asemeyáu al que tienen otres universidaes», pa que la xente pueda velu y faiga les aportaciones correspondientes.

Les declaraciones del máximu mandatariu de la Universidá vienen depués de que’l Conceyu Universitariu pol Asturianu (CUPA) presentara una reclamación formal sobre’l Reglamentu d’Estudios de Doctoráu. El CUPA quier un cambiu nel artículu que diz que les tesis tienen que redactase en castellanu y que recueya tamién l’asturianu «pa evitar la situación de marxinalidá que vien causando dellos casos qu’enfrentaron a la Universidá colos sos alumnos».

El rector diz que naide pue dicir que’l so equipu rectoral portóse mal col asturianu: «Tolo contrario: fomos l’equipu que más fiximos pola llingua y vamos siguir nesta llinia». Asina, Gotor esplica qu’él ye partidariu de que nos campos que traten sobre l’asturianu pueda incluise esti idioma ensin problema, «pero hai que facelo d’alcuerdu cola llei, porque l’asturianu nun ye oficial y esta nun ye una cuestión de la Universidá. Con too, tamos potenciándolo, así que nun se cree nenguna polémica, porque va facese dalguna adición pa que tea presente».

(de Les Noticies, 30-06-2011)